Netanıahý Izraıl AQSh-tyń áskerı kómeginen bas tartýy múmkin ekenin boljady

ASTANA. KAZINFORM — Izraıl premer-mınıstri Bınıamın Netanıahý el AQSh-tan jyl saıyn alatyn amerıkalyq áskerı kómek máselesin qaıta qaraý qajettigi týraly málimdedi, dep habarlaıdy Anadoly.

Izraıldik «Maarıv» gazetiniń habarlaýynsha, mınıstrler kabınetiniń basshysy bul týraly parlamenttiń halyqaralyq ister jáne qaýipsizdik komıtetiniń jabyq otyrysynda málimdedi.

— Biz qarý-jaraq úshin shamamen 4 mıllıard dollar alyp otyrmyz. Meniń oıymsha, bir kezderi ekonomıkalyq kómekten sharshaǵanymyzdaı, osydan da sharshaımyz, — dep keltirdi basylym Netanıahýdyń sózderin.

KAN da osyǵan uqsas aqparatty taratty.

— Biz qaýipsizdik salasyndaǵy amerıkalyq kómek alýdy toqtatýǵa májbúr bolamyz dep shamalaımyn, — dep keltirdi memlekettik telearna úkimet basshysynyń sózin.

Birqatar ızraıldik BAQ bul sózderdi Netanıahý men Tramp arasyndaǵy qarym-qatynastyń salqyndaǵanynyń belgisi dep túsindirip otyr.

Atap aıtqanda, AQSh-tyń Iranmen kelissóziniń bastalýy, Ulttyq qaýipsizdik jónindegi keńesshi Maık Ýoltstyń qyzmetinen bosatylýy, sondaı-aq Vashıngtonnyń ıemendik hýsıttermen atysty toqtatýdy qoldaýyna nazar aýdarylyp otyr. 

Baspasóz habarlaryna qaraǵanda, Tramptyń Netanıahýdan «kóńili qaldy» jáne Taıaý Shyǵystaǵy saıasatyn Izraıl kóshbasshysynyń qatysýynsyz qurý máselesin qarastyryp otyr. 

AQSh pen Izraıl 2016 jyly 10 jyldyq ózara túsinistik týraly memorandýmǵa qol qoıdy, ol 2028 jylǵa deıin 38 mlrd dollar kóleminde áskerı kómekti qarastyrady.

Sonymen qatar, 2019 jyly qol qoıylǵan kelisim boıynsha AQSh Izraılge jyl saıyn shamamen 3,8 mlrd dollar kóleminde áskerı kómek kórsetip jatyr.

Buǵan deıin Tramp Netanıahýmen kezdesýde Gaza sektoryn baqylaýǵa alý ıdeıasyn taǵy da alǵa tartty.