Netanıahý Irannyń ıadrolyq baǵdarlamasyn talqylaý úshin Vashıngtonǵa bara jatyr
ASTANA. KAZINFORM – Izraıl premer-mınıstri Bınıamın Netanıahý AQSh prezıdenti Donald Tramppen kelissózder ótkizý úshin Vashıngtonǵa attandy. Sapar Irannyń ıadrolyq baǵdarlamasy boıynsha Vashıngton men Tegeran arasyndaǵy dıalog qaıta jandanǵan tusta ótip otyr, dep habarlaıdy Kazinform agenttiginiń menshikti tilshisi.
Izraıldik BAQ úkimettegi derekkózderge silteme jasap habarlaǵandaı, kezdesýdiń negizgi taqyryby Irannyń ıadrolyq baǵdarlamasy jáne AQSh pen Iran arasyndaǵy kelissózderdiń barysy bolmaq.
Izraıl premer-mınıstriniń keńsesi taratqan málimetke sáıkes, Netanıahýdyń AQSh prezıdentimen kezdesýi bastapqyda keıinge josparlanǵan. Alaıda Izraıl tarapynyń bastamasymen sapar belgilengen merzimnen buryn júzege asyryldy.
Aqparatqa qaraǵanda, bul sheshimniń maqsaty – Izraıldiń ustanymyn AQSh basshylyǵyna tikeleı jetkizý jáne Iranǵa qatysty jańartylǵan barlaý málimetterin usyný. Sondaı-aq Netanıahý yqtımal kelisimsharttardy qatańdatýdy qoldap, kelissózder kún tártibine Irannyń zymyran baǵdarlamasy men óńirlik qarýly toptarǵa kórsetip otyrǵan qoldaý máselelerin engizýdi talap etýi múmkin.
Buǵan deıin habarlanǵandaı, Netanıahý men Tramptyń kezdesýi Aq úıde sársenbi kúni, 11 aqpanda ótedi dep josparlanǵan.
Aldaǵy saparǵa Iran tarapynan da reaktsııa bildirildi. Iran Syrtqy ister mınıstrliginiń resmı ókili Esmaıl Bagaı Tegeran syrtqy aralasý áreketterin dıplomatııalyq protseske nuqsan keltiretin faktor retinde baǵalaıtynyn málimdedi.
– Kelissózderdegi bizdiń qarsy tarapymyz – Amerıka Qurama Shtattary. Sondyqtan dál solar qysym men óńirge zııan keltiretin destrýktıvti yqpaldarǵa táýelsiz áreket ete alatynyn kórsetýi tıis, – dedi Iran SІM ókili.
– Amerıka Qurama Shtattary óz syrtqy saıasatyn ózge elderdiń aıqyndaýyna jol bermeýi kerek, – dep atap ótti Esmaıl Bagaı.
Irandyq taraptyń pikirinshe, Izraıl buǵan deıin óńirdegi dıplomatııalyq bastamalarǵa qarsy shyǵyp, shıelenisti báseńdetýge baǵyttalǵan kez kelgen protsesti buzýǵa umtylǵan.
Eske salaıyq, Tegeran men Vashıngton ótken aptada Oman astanasy Maskatta janama kelissózderdi qaıta bastaǵan bolatyn. Iran bıligi dıalog tek ıadrolyq másele men sanktsııalardy alyp tastaý taqyrybymen shektelýi tıis ekenin, al zymyran baǵdarlamasy men óńirlik saıasatty talqylaýdy qabyldamaıtynyn málimdegen.
Buǵan deıin Iran prezıdenti Masýd Pezeshkıan Oman aýmaǵynda ótken kelissózderdi alǵa jasalǵan qadam dep atap, ıAdrolyq qarýdy taratpaý týraly shart aıasynda Iran quqyqtary saqtalǵan jaǵdaıda dıplomatııalyq baǵytty ustanýǵa daıyn ekenin rastaǵan edi.
AQSh tarapy da Tegeranmen baılanystardy aldaǵy ýaqytta jalǵastyrýǵa nıetti ekenin bildirip, kelissózderdiń aldyńǵy kezeńin konstrýktıvti dep baǵalaǵan.