Netanıahý Irannyń tize búgýine az qalǵanyn málimdedi
ASTANA. KAZINFORM – Izraıl premer-mınıstri Bınıamın Netanıahý Sırııadaǵy Izraıl áskeri ornalasqan pozıtsııalarǵa baryp, Tegeranmen jalǵasyp jatqan teketireske qatysty málimdeme jasady, dep habarlaıdy Kazinform agenttiginiń menshikti tilshisi.
Izraıl úkimetiniń basshysy sársenbi kúni qorǵanys mınıstri Israel Kats jáne Qorǵanys armııasy Bas shtaby bastyǵynyń orynbasary Tamır ıAdaımen birge Hermon taýynyń Sırııa aýmaǵyndaǵy bóligine bardy.
Sapar barysynda Netanıahý Izraıldiń qazirgi Iran basshylyǵyn jeńýine az qalǵanyn aıtty. Bul týraly Izraıl premer-mınıstri keńsesiniń resmı akkaýntynda habarlandy.
— Alda áli atqaratyn jumysymyz bar. Basty mindet – Irandaǵy terrorıstik rejımdi talqandaý, oǵan óte az qaldy. Aqyr sońynda Iran bastaǵan búkil kúsh birtutas júıe retinde kúıreıdi», – dedi Netanıahý.
Izraıl basshysy el shekarasyna jaqyn aýmaqta terrorıstik uıym dep tanıtyn qarýly kúshterdiń ornalasýyna jol bermeıtinin málimdedi.
Premer-mınıstr keńsesiniń habarlaýynsha, Netanıahý Sırııa aýmaǵyna qaraıtyn Izraıl áskerı beketine barǵan. Áskerı qolbasshylyq oǵan óńirdegi jedel jaǵdaı týraly baıandady.
— Biz Hermon shyńynan ıArmýk ózenine deıingi, osy jerden Jerorta teńizine deıingi búkil aýmaqty baqylaýda ustap otyrmyz, — dedi Netanıahý.
Sırııa Syrtqy ister mınıstrligi Izraıl premer-mınıstriniń saparyn qatań synǵa alyp, ony el aýmaǵyna zańsyz kirý dep baǵalady.
— Bul – arandatýshylyq áreket ári Sırııa Arab Respýblıkasynyń egemendigi men aýmaqtyq tutastyǵyn, sondaı-aq halyqaralyq quqyq normalaryn óreskel buzý, – delingen Sırııa Syrtqy ister mınıstrliginiń málimdemesinde.
2024 jylǵy jeltoqsanda Bashar Asad úkimeti qulaǵannan keıin Izraıl áskerıleri buǵan deıin BUU baqylaýyndaǵy býferlik aımaqqa ásker kirgizdi. Bul aýmaq 1974 jyldan beri Izraıl basyp alǵan Golan jotalary mańynda Sırııa men Izraıl kúshterin bólip turǵan.
Sodan beri Izraıl Sırııadaǵy nysandarǵa júzdegen soqqy jasap, el aýmaǵynda birneshe márte jerústi operatsııasyn ótkizdi.
Izraıl bıliginiń málimdeýinshe, áskerıler ózderi qurǵan qaýipsizdik aımaǵynda qalady. Al Sırııanyń ońtústigindegi oǵan irgeles aýdandar qarýsyzdanýǵa tıis.
Buǵan deıin Izraıl áskeriniń Sırııanyń ońtústigindegi provıntsııaǵa oq atqany týraly habarlaǵan edik.
Aqzat Jıenalına
