Netanıahý Irannyń Izraılge qatysty málimdemesin kúmánmen qabyldady
ASTANA. KAZINFORM – TASS habarlaǵandaı, Izraıl premer-mınıstri Bınıamın Netanıahý Iran SІM basshysy Abbas Aragchıdiń Islam Respýblıkasy Izraıl óziniń agressııasyn toqtatsa, evreı memleketine soqqy berýdi toqtatýǵa daıyn ekendigi týraly málimdemesine kúmánmen qarady.
Onyń oıynsha, Iran mundaı málimdeme jasaý arqyly «jaman nıetpen áreket etip jatyr».
– Másele deeskalatsııada emes. Másele atysty toqtatýda emes. Másele bizdiń ómir súrýimizge qaýip tóndiretin nárseni toqtatýda jáne biz olardy toqtatýǵa nıettimiz, - dep qosty Netanıahý.
Buǵan deıin Aragchı Irannyń qorǵanysy «tolyq zańdy» jáne «[Izraıldiń] agressııasy toqtasa, Tegerannyń jaýap áreketteri de toqtaıdy» dep málimdedi. Islam Respýblıkasynyń Syrtqy ister mınıstri sondaı-aq Izraıldiń «ıadrolyq máselede eshqandaı kelisimge qol jetkizgisi, kelissóz júrgizgisi kelmeıtinin jáne dıplomatııany qalamaıtynyn» atap ótti.
Bı-bı-sı habarlaǵandaı, Iran men Izraıl jeksenbide bir-birine soqqy jasady.
AQSh prezıdenti Donald Tramp ABC News arnasyna bergen suhbatynda AQSh Iran-Izraıl qaqtyǵysyna aralasýy múmkin ekenin aıtty.
Ol eger Vladımır Pýtın Iran men Izraıl arasynda beıbitshilik ornatýda deldal rólin óz moınyna alsa, qarsy bolmaıtynyn basa aıtty.
Izraıldiń tótenshe jaǵdaılar qyzmeti Haıfada Iran zymyranynan keıin bastalǵan órt týraly habarlady.
Izraıl Islam Respýblıkasy Syrtqy ister mınıstrligine tıesili ǵımarattardyń birine soqqy berdi. Bul týraly Syrtqy ister mınıstriniń orynbasary Saıd Hatıbzade málimdedi, dep habarlaıdy TASS.
– Izraıl Iran Syrtqy ister mınıstrliginiń ǵımarattarynyń birine qasaqana jáne aıaýsyz soqqy berdi. <…> Birneshe beıbit turǵyn, sonyń ishinde meniń áriptesterim de jaralandy, - dep jazdy ol H jelisinde.
Zardap shekkender aýrýhanaǵa jetkizildi.
IRNA aqparat agenttiginiń habarlaýynsha, Iran zymyrandary Tel-Avıv, Haıfa jáne Ashkelonǵa jetken.
13 maýsymǵa qaraǵan túni Izraıl Irannyń ıadrolyq baǵdarlamasyna qarsy baǵyttalǵan operatsııasyn bastady. Bir táýlik ótpeı-aq Islam Respýblıkasy jaýap retinde shabýyl jasady. 14 maýsym men 15-ine qaraǵan túni Izraıl men Iran taǵy bir-birine soqqy berdi.