Netanıahý Iranǵa qarsy soqqylardy kúsheıtýdi buıyrdy

ASTANA. KAZINFORM — Izraıl premer-mınıstri Bınıamın Netanıahý Tegerannan kelgen tańǵy raketalyq shabýyldan keıin Izraıl armııasyna Iranǵa qarsy soqqylardy kúsheıtý jóninde buıryq berdi, dep habarlaıdy Anadoly. 

Áleýmettik jelide jarııalanǵan málimdemesinde Netanıahý Irannyń Tel-Avıv pen onyń mańaıyndaǵy birneshe nysanǵa baǵyttalǵan qarymta shabýylyna qatysty pikir bildirdi.

Ol Iran basshylyǵyna ses kórsetip, «Hameneı bul áreketteri úshin jaýap beredi» dep málimdedi.

Izraıldiń qorǵanys mınıstri Israel Kats ta áleýmettik jeli arqyly málimdeme jasap, qatty syn aıtty.

Kats tańerteńgi Iran shabýylyn «soǵys qylmysy» dep atap, Irannyń rýhanı kósemi Álı Hameneı oryn alǵan oqıǵa úshin jaýapkershilikke tartylady dedi. Ol Netanıahýmen birge armııaǵa Iranǵa qarsy áskerı operatsııalardy kúsheıtý týraly buıryq bergenin jetkizdi.

Iran Izraılge jaýap retinde raketalyq soqqy jasady

Tańerteń Iran Izraıl aýmaǵyna raketalyq soqqy berdi.

Habarlamalarǵa sáıkes, zymyrandar Tel-Avıv, Ramat-Gan, Holon qalalaryndaǵy jáne ońtústiktegi Beer-Sheva (Birıýssebı) qalasyndaǵy birneshe nysandy qıratqan.

Irandyq zymyrandardyń biri Beer-Shevadaǵy «Soroka» aýrýhanasyna tıgeni de aıtylyp jatyr.

Qaqtyǵys Izraıldiń Iranǵa jappaı shabýylynan bastaldy

13 maýsymda Izraıl Irannyń ıadrolyq nysandaryna jáne eldiń áskerı basshylyǵy ornalasqan aımaqtarǵa jappaı áýe soqqysyn bastady.

Atalǵan shabýyldardyń saldarynan Iran Qarýly kúshteri Bas shtabynyń bastyǵy, Islam revolıýtsııasy saqshylar korpýsynyń bas qolbasshysy, birqatar joǵary laýazymdy áskerı tulǵalar jáne ıadrolyq zertteýlermen aınalysqan toǵyz maman qaza tapty. Jalpy, 13 maýsymnan beri Iranda keminde 585 adam qaza taýyp, 1300-den astam adam jaralanǵan.

Jaýap retinde Iran ballıstıkalyq zymyrandarmen Izraıl aýmaǵyna soqqy jasady. Resmı málimet boıynsha, bul shabýyldan 24 adam qaza taýyp, 500-den astam adam jaralanǵan.

Túrkııa da qosa alǵanda, birqatar memleketter Izraıldiń áreketin qatań aıyptady. 

Aıta ketelik Makron Izraıldiń Iranǵa jasaǵan shabýyldaryn dereý toqtatýǵa shaqyrǵan edi.