Netanıahý Irandy Izraılge qarsy áreket etse, qatań jaýap qaıtarylatynyn eskertti
ASTANA. KAZINFORM — Premer-mınıstr Izraıl oqıǵanyń kez kelgen órbýine daıyn ekenin jáne AQSh prezıdentimen Irannyń ıadrolyq baǵdarlamasyn talqylaýǵa nıetti ekenin málimdedi, dep habarlaıdy Kazinform menshikti tilshisi.
Izraıl premer-mınıstri Bınıamın Netanıahý Izraıl Irannyń jaqynda ótkizgen áskerı jattyǵýlarynan habardar ekenin jáne jaǵdaıdy muqııat baqylap otyrǵanyn málim etti. Ol bul týraly dúısenbi kúni Ierýsalımde Grekııa premer-mınıstri Kırıakos Mıtsotakıs jáne Kıpr prezıdenti Nıkos Hrıstodýlıdıspen birlesken baspasóz konferentsııasynda habarlady.
— Biz muny baqylap, barlyq qajetti daıyndyq jumystaryn júrgizip jatyrmyz. Men Iranǵa anyq aıtqym keledi: Izraılge qarsy kez kelgen áreket óte qatań jaýappen qaıtarylady, — dep atap ótti Netanıahý.
Onyń aıtýynsha, Tegerannyń ıadrolyq qyzmeti Izraıl premer-mınıstriniń Vashıngtonǵa aldaǵy sapary kezinde AQSh prezıdenti Donald Tramppen talqylanatyn taqyryptardyń biri bolady.
Netanıahý sońǵy shıelenisterge qaramastan, Izraıl Iranmen qaqtyǵysqa umtylmaıtynyn jáne aımaqtaǵy turaqtylyq pen qaýipsizdikke múddeli ekenin atap ótti.
Buǵan deıin Iran BAQ-tary eldiń birneshe qalasynda zymyran jattyǵýlary ótkenin habarlaǵan bolatyn. Batys elderi Irannyń zymyrandyq múmkindikterin Taıaý Shyǵystaǵy jaǵdaıdy turaqsyzdandyrýǵa qabiletti faktor retinde qarastyrady, al Tegeran ıadrolyq qarý jasaý nıetin joqqa shyǵaryp otyr.
Kezdesý barysynda Izraıl, Grekııa jáne Kıpr kóshbasshylary sondaı-aq qaýipsizdik jáne energetıka salasyndaǵy yntymaqtastyqty keńeıtýge, sonyń ishinde Shyǵys Jerorta teńizi men Eýropa arasyndaǵy baılanysty nyǵaıtýǵa baǵyttalǵan ınfraqurylym men energetıkalyq jobalardy damytýǵa kelisti.
Together, we bring stability through strength, prosperity through strength, and most important, peace through strength.
— Prime Minister of Israel (@IsraeliPM) December 22, 2025
I wish you all Happy Holidays. Thank you. pic.twitter.com/OZdpmxBC86
The Times of Israel atap ótkendeı, Grekııa, Kıpr jáne Izraıl arasyndaǵy onynshy úshjaqty sammıt Afıny, Nıkosııa jáne Tel-Avıvtiń Shyǵys Jerorta teńizinde jedel áreket etý kúshterin qurý múmkindigin zerttep jatqany týraly habarlamalar aıasynda ótti. Bul talqylaýlar Grekııanyń aımaqta Túrkııanyń áskerı qatysýy men yqpalynyń keńeıýine qatysty alańdaýshylyǵynyń artýynan týyndap otyr.
Sammıtte sóz sóılegen Netanıahý aımaqtyq qaýipsizdik máselesine de toqtaldy, ol Ankarany tikeleı ataǵan joq, biraq keıbir memlekettiń óz yqpalyn arttyrý áreketterin aıqyn meńzedi.
— Bizdiń barlyq elimizdi buryn ártúrli ımperııalar jaýlap alǵan, biraq batyldyq pen qurbandyqtyń arqasynda biz qazirgi zamanda táýelsizdikke qol jetkizdik. Imperııalardy qalpyna keltirýdi jáne bizdiń jerlerimizge ústemdik etýdi armandaıtyndarǵa aıtarym — ol týraly umytyńyzdar. Bul bolmaıdy, — dep málimdedi ol.
Izraıl premer-mınıstriniń aıtýynsha, Izraıl, Grekııa jáne Kıpr óz qaýipsizdigin ózdiginen qamtamasyz ete alady, al úshjaqty yntymaqtastyqty tereńdetý bul áleýetti odan ári arttyrady.
Buǵan deıin Izraıl Lıvan aýmaǵyndaǵy «Hezbolla» nysandaryna soqqy jasaǵany belgili boldy.
Sondaı-aq AQSh senatory HAMAS pen Hezbollanyń qaıta qarýlanyp jatqanyn málimdedi.