Netanıahý Iran bıligin qulatýdy Izraıldiń basty mindeti dep atady
ASTANA. KAZINFORM – Izraıl premer-mınıstri Bınıamın Netanıahý Irandaǵy qazirgi bılikti qulatýdy eliniń aldaǵy kezeńdegi basty mindeti dep atady, dep habarlaıdy Anadolu.
Izraıl premer-mınıstriniń keńsesi taratqan málimetke sáıkes, Netanıahý Tel-Avıvtegi «Kırııa» Qorǵanys mınıstrligi kesheninde qorǵanys mınıstri Israel Kats, Bas shtab bastyǵy Eıal Zamır jáne basqa da áskerı qolbasshylarmen kezdesti.
Kezdesý barysynda Izraıl premer-mınıstri eliniń «Irannan tónetin qaýipti» keıin shegindire alǵanyn málimdedi. Onyń pikirinshe, Tegeran bıliginiń pozıtsııasy álsiregen.
– Aldymyzda turǵan basty mindet – Iran rejımin qulatý. Bul máselede óz múmkindikterimizge senimdimiz. Bul Izraıl úshin negizgi mindetterdiń biri jáne ony júzege asyrýǵa bolady. Tipti oǵan jaqyn bolashaqta qol jetkizý múmkin dep esepteımiz, – dedi Bınıamın Netanıahý.
Ol sondaı-aq Irannyń Izraıl tarapynan jaýap soqqysy bolýy múmkin degen qaýipke baılanysty shabýyl jasaýdan tartynyp otyrǵanyn alǵa tartty.
Anadolu málimetinshe, bul málimdeme Izraılde 27 qazanǵa belgilengen saılaý qarsańynda jasaldy.
Qoǵamdyq pikir saýalnamalary burynǵy Bas shtab bastyǵy Gadı Aızenkottyń «ıAshar» partııasy saılaýaldy básekede alda kele jatqanyn kórsetip otyr.
Basylym Netanıahýdyń reıtıngi tómendegen tusta onyń syrtqy saıasatqa qatysty rıtorıkasy men basqa memleketterge baǵyttalǵan málimdemeleri kúsheıgenin atap ótti.
Aıta keteıik, Izraıl Iran shabýyl jasaǵan jaǵdaıda qatań jaýap beretinin málimdegen bolatyn.
