Netanıahý HAMAS múshelerine raqymshylyq jasalýy múmkin ekenin málimdedi
ASTANA.KAZINFORM - Izraıl premer-mınıstriniń málimdemesi Vashıngtonda AQSh prezıdenti Donald Tramppen kezdesý qarsańynda aıtyldy, dep habarlaıdy Kazinform agenttiginiń menshikti tilshisi.
Jeksenbi kúni Izraıl premer-mınıstri Bınıamın Netanıahý Fox News arnasyna bergen suhbatynda HAMAS jetekshileri barlyq ızraıldik kepilge alynǵandardy bosatyp, Gaza sektorynan ketýge kelisse, olarǵa raqymshylyq jasaýǵa daıyn ekenin aıtty.
- Eger HAMAS jetekshileri soǵysty toqtatyp, kepilge alynǵandardyń barlyǵyn bosatsa, biz olardyń ketýine ruqsat beremiz, - degen ol aldaǵy áreketter áli talqylanyp jatqanyn basa aıtty.
Onyń sózderi Tramp ákimshiligi ázirlegen AQSh-tyń beıbitshilik jospary týraly tarap ketken aqparatty rastady.
23 qyrkúıekte BUU Bas Assambleıasynyń otyrysynda Tramp arab jáne musylman memleketteriniń basshylaryna Gaza sektoryna arnalǵan 21 tarmaqtan turatyn jospardy tanystyrdy, onda HAMAS-ty bolashaqta aýmaqty basqarýǵa qatysý múmkindiginen aıyrý usynylǵan.
Jobaǵa sáıkes, HAMAS sodyrlary 48 saǵat ishinde kepilge alynǵan 48 Izraıl azamatyn bosatý kerek, sodan keıin olarǵa anklav aýmaǵynan ótýge ruqsat beriledi. Óz kezeginde Izraıl soǵys bastalǵaly qamaýǵa alynǵan júzdegen palestınalyq tutqyndy bosatyp, qaza tapqan palestınalyqtardyń denesin tapsyrady.
Jospar Gaza sektorynda halyqaralyq turaqtandyrý kúshteriniń qatysýymen palestınalyq tehnokrattardan turatyn ýaqytsha ákimshilik qurýdy kózdeıdi. Bul kúsh qaýipsizdik pen jańa Palestına polıtsııasynyń daıyndyǵyna jaýapty bolady.
Sondaı-aq qujatta Netanıahýdyń bılikti Palestına ulttyq bıligine berý múmkin emestigi týraly málimdemelerine qaıshy keletin «Palestına memlekettiligine senimdi jol» týraly tarmaq bar.
Jospar Tramptyń basyp alynǵan Batys jaǵalaýdy anneksııalamaý týraly ýádesin qamtıdy jáne qaýipsizdikti qamtamasyz etý úshin arab jáne musylman elderiniń áskerı qoldaý kórsetýin qarastyrady.
Іshki saıası faktorlarǵa baılanysty Izraıldiń ózinde jaǵdaı qıyndady.
The Times of Israel basylymynyń habarlaýynsha, Netanıahý sońǵy kúnderi óziniń jaqyn keńesshilerimen, sonyń ishinde AQSh-tyń arnaıy ókili Stıv Ýıtkoff pen Djared Kýshnermen pozıtsııalaryn kelisý maqsatynda jabyq kezdesýler ótkizgen.
Alaıda, Netanıahýǵa Izraıldiń basqarýshy koalıtsııasy ishinde HAMAS-qa qatysty kez kelgen jeńildikke úzildi-kesildi qarsylyq bildiretin ońshyl seriktesteri tarapynan qysym kúsheıip keledi.
HAMAS-qa raqymshylyq jasaý múmkindigi týraly aqparat ızraıldik ońshyl toptardyń ótkir reaktsııasyn týdyrdy.
Vashıngtondaǵy jáne arab elderindegi optımızm AQSh prezıdentiniń ózi osy tusta optımıstik tanytyp otyr. Áleýmettik jelidegi jazbalarynda Donald Tramp «barlyq tarap alǵash ret erekshe jańalyqqa eleńdep otyr» jáne kelisim jaqyn kúnderi jarııalanýy múmkin dep málimdedi.
AQSh vıtse-prezıdenti Djeı Dı Vens sondaı-aq kelissózderdiń «qıyn, biraq sońǵy aılarǵa qaraǵanda úmit kúterlik» ekenin atap ótti.
Jarııalanǵan málimetter arab áleminde de qyzý reaktsııa týdyrdy. Iordanııa koroli ІІ Abdalla jospardyń kóp tarmaǵy arab elderiniń buryn aıtylǵan ustanymdaryna sáıkes keletinin, biraq sońǵy nusqasy aıtarlyqtaı túzetýlerdi qajet etetinin atap ótti.
Sondaı-aq arab BAQ-tary Izraıldiń Qatardaǵy nysandarǵa jaqynda jasaǵan soqqylaryna qatysty alańdaýshylyqty atap ótti, bul Dohanyń deldal retindegi rólin qıyndatýy múmkin.
Tramp dúısenbi kúni Aq úıde Netanıahýdy qabyldaıtyny habarlandy. Amerıka ákimshiligi kelissóz nátıjesinde mámileniń parametrleri boıynsha kelisim týraly habarlandyrýǵa ákelý múmkindigin joqqa shyǵarmaıdy, biraq Izraıl basshylyǵy negizgi máselelerde «mańyzdy kelispeýshilikter» bar ekenin moıyndaıdy.
Osyǵan deıin Gazada qaza tapqandardyń sany 66 myńnan asqany týraly jazdyq.