Netanıahý Gaza sektoryn tolyq basyp alýdy kózdep otyr — Izraıl baspasózi
ASTANA. KAZINFORM — Izraıl úkimetinde Gaza sektoryndaǵy áskerı kampanııanyń bolashaǵyna qatysty kelispeýshilikter kúsheıip keledi. Bul Premer-mınıstr Bınıamın Netanıahýdyń shabýyldy kúsheıtý jáne anklavty tolyǵymen okkýpatsııalaý jospary aıasynda bolyp otyr, dep habarlaıdy Kazinform agenttiginiń menshikti tilshisi.
Izraıldik The Times of Israel gazetiniń habarlaýynsha, Netanıahý úkimet múshelerine Gaza sektoryn tolyq basyp alý josparyna úkimettiń maquldaýyn alǵysy keletinin jetkizgen. Bul nıetke armııa tarapynan qarsylyq kórsetilip jatqanyna qaramastan, ol óz ustanymynda tabandylyq tanytyp otyr.
Izraıldik BAQ-tyń jazýynsha, premer-mınıstr kabınet múshelerimen jabyq kezdesýlerde alǵashqy ret «sektordy okkýpatsııalaý» degen tirkesti qoldanǵan. Bul málimdeme onyń áskerı strategııasyna qatysty rıtorıkasynyń kúrt kúsheıgenin kórsetip otyr jáne operatsııanyń bolashaǵyna qatysty pikirtalastardy tereńdete tústi.
Armııa qarsy
Áskerı baǵalaý boıynsha, qazirgi tańda Izraıl kúshteri Gaza sektorynyń shamamen 75% aýmaǵyn baqylaıdy. Jańa bastama qalǵan aýmaqtarda operatsııa júrgizip, sektordy tolyq áskerı baqylaýǵa alýdy kózdeıdi.
Alaıda Izraıl Qarýly kúshteriniń basshylyǵy (TsAHAL) bul ıdeıaǵa qarsy. Olardyń pikirinshe, HAMAS-tyń barlyq ınfraqurylymyn joıý kóp jylǵa sozylýy múmkin jáne tutqyndardyń ornalasqan oryndaryna jaqyndaý olardyń ómirine tikeleı qaýip tóndirýi múmkin.
Boljam boıynsha, ızraıldik kúshter operatsııalardy tutqyndar ustalyp otyrǵan aımaqtarda da júrgizetin bolady.
— Sheshim qabyldandy, biz Gaza sektoryn tolyq basyp alamyz. Eger TsAHAL Bas shtabynyń bastyǵy buǵan kelispese ornyn bosatsyn, — degen anonımdi joǵary laýazymdy sheneýniktiń sózi Ynet portalynda jarııalandy.
Kelispeýshilik kúsheıip otyr
Izraıldiń 12-arnasy habarlaǵandaı, dúısenbi kúni Izraıldiń áskerı-saıası basshylyǵynda aıqyn bóliný baıqaldy.
Okkýpatsııany qoldaıtyndar qatarynda:
Strategııalyq josparlaý mınıstri Ron Dermer,
Qarjy mınıstri Betsalel Smotrıch,
Ulttyq qaýipsizdik mınıstri Itamar Ben Gvır,
Premer-mınıstrdiń áskerı hatshysy general-maıor Roman Gofman,
Úkimet hatshysy Iosı Fýks.
Qarsy tarapta:
TsAHAL Bas shtabynyń bastyǵy general-leıtenant Eıal Zamır,
Syrtqy ister mınıstri Gıdeon Saar,
ShAS partııasynyń basshysy Are Derı,
Ulttyq qaýipsizdik keńesshisi Tsahı Hanegbı,
«Mossad» barlaý qyzmetiniń basshysy Davıd Barnea,
ShABAK qaýipsizdik qyzmetiniń tutqyndar boıynsha kelissóz júrgizýshisi, «Mem» degen búrkenshik atpen tanymal sheneýnik,
Zalojnıkter máselesin qadaǵalap otyrǵan general-maıor (otstavkadaǵy) Nıtsan Alon.
Izraıl oppozıtsııasynyń jetekshisi ıAır Lapıd seısenbi kúni premer-mınıstrdi armııa basshylyǵymen kelispeýshilikterdi jarııa túrde kórsetý arqyly ishki saıası ahýaldy ýshyqtyrdy dep aıyptady. Ol mundaı mańyzdy máselelerdiń jabyq esik jaǵdaıynda talqylanýy tıis ekenin atap ótti.
Alda bolatyn sheshim
Seısenbi kúni Netanıahý keńeıtilgen úkimet otyrysyn shaqyryp, áskerı operatsııanyń kelesi kezeńine ruqsat alatynyn rastady.
Kúni boıy premer-mınıstr qorǵanys mınıstri, TsAHAL Bas shtabynyń bastyǵy, mınıstr Dermer jáne TsAHAL-dyń operatsııalyq basqarma jetekshisimen shekteýli quramda jumys kezdesýin ótkizedi dep kútilýde.
12-arnanyń habarlaýynsha, bul kezdesýde operatsııanyń múmkin bolatyn birneshe stsenarııi usynylady. Qorytyndy sheshim osy apta ishinde úkimettiń bekitýine shyǵarylady.