Netanıahý Dohaǵa ne úshin soqqy jasaǵanyn aıtty
ASTANA. KAZINFORM – Izraıl premer-mınıstri HAMAS basshylyǵyna jasalǵan soqqyny terrorızmge qarsy kúres úshin amalsyzdan barǵan qadam dep baǵalady. Bul týraly Kazinform menshikti tilshisi habarlady.
Izraıl premer-mınıstri Bınıamın Netanıahý seısenbi kúni Qatar astanasy Dohadaǵy palestınalyq HAMAS tobynyń shtab-páterine ne úshin soqqy jasalǵanyn túsindirdi.
Ol bul operatsııanyń 6 adam kóz jumǵan Ierýsalım qalasyna jasalǵan terakt pen Gaza sektorynda 4 áskerı qyzmetshi mert bolǵan Izraıl tankisine jasalǵan shabýyldan keıin qolǵa alynǵan qadam bolǵanyn jetkizdi.
Bul týraly Izraıl premer-mınıstriniń keńsesi taratqan málimdemede aıtylǵan.
Qorǵanys mınıstri Israel Katspen birge ol osy shabýyldardyń artynda HAMAS turǵanyn jáne olar Izraıl azamattaryn óltirýdi josparlaýyn jalǵastyryp kele jatqanyn málimdedi.
Yesterday, after the murderous attacks in Jerusalem and Gaza, Prime Minister Netanyahu directed all security elements to prepare for the possibility of striking the Hamas leadership. The Defense Minister fully supported this initiative.https://t.co/dQDySUqQJv
— Prime Minister of Israel (@IsraeliPM) September 9, 2025
- 7 qazandaǵy qyrǵynǵa, adam urlaýǵa jáne keshe Ierýsalım men Gazada bolǵan shabýyldarǵa jaýapty HAMAS basshylyǵy. Izraıl armııasy jaýlarymyz tolyq joıylǵanǵa deıin toqtamaıdy. Izraıldiń quryǵy uzyn, ol terrorızmdi álemniń kez kelgen jerinen tabady», — dedi Netanıahý.
Operatsııany Izraıl Qorǵanys Armııasy (TsAHAL) men ShABAK qaýipsizdik qyzmeti júzege asyrdy. Ol «Otty Shyń» dep atalyp, HAMAS-tyń joǵary basshylyǵyna baǵyttaldy.
Arab BAQ-tary Qatardaǵy soqqylar nátıjesinde bes adamnyń qaza tapqanyn habarlady. Olar HAMAS músheleri bolǵanymen, basshylyq quramyna kirmegeni aıtyldy.
Qaza tapqandardyń arasynda Gaza sektoryndaǵy HAMAS kóshbasshysy Halıl al-Haıdyń uly Hımam al-Haııa, Halıl al-Haıdyń keńse dırektory Djıhad Labad Abý Bılal, sondaı-aq, joǵary laýazymdy HAMAS sheneýnikteriniń kúzetshileri nemese keńesshileri Abdýlla Abý Halıl, Moamen Abý Omar jáne Ahmad Abý Malık bar.
Reported footage of the Israeli airstrike that targeted Hamas' leadership in Doha today. pic.twitter.com/vm0E4fepjZ
— Joe Truzman (@JoeTruzman) September 9, 2025
Izraıl armııasy habarlaǵandaı, operatsııaǵa onnan astam ushaq qatysyp, Dohadaǵy HAMAS basshylyǵy ornalasqan ǵımaratqa onnan asa dál soqqy jasady. Uzaq qashyqtyqtaǵy mıssııany oryndaý úshin birneshe ret ushaqtardyń janarmaıyn toltyrý qajet boldy.
TsAHAL soqqy bergenge deıin azamattarǵa keletin zııandy azaıtý sharalaryn qabyldaǵanyn, sonyń ishinde joǵary dáldiktegi qarý qoldanylǵanyn jáne qosymsha barlaý málimetteri jınalǵanyn atap ótti.
BAQ habarlaǵandaı, Aq úı Izraıldiń josparlanǵan shabýyly týraly AQSh-ty aldyn ala habarlaǵanyn rastady. Amerıkalyq resmı tulǵalar Qatardy Vashıngtonnyń negizgi odaqtasy jáne AQSh-tyń iri áskerı bazasynyń ornalasqan orny retinde atap ótti.
Izraılde operatsııa úlken saıası rezonans týdyrdy. Oppozıtsııa lıderi ıAır Lapıd armııa men arnaıy qyzmetterdi jaýǵa qarsy júrgizgen tamasha operatsııa úshin quttyqtady. «Ulttyq birlik» partııasynyń lıderi Bennı Gants saıası jetekshilik durys sheshim qabyldady dep atap ótip, Izraıl HAMAS terrorısterin árdaıym jáne kez kelgen jerde qýyp júrýi tıis ekenin aıtty.
— «Evreı qanynan arzan nárse joq. 7 qazandaǵy qyrǵyndy uıymdastyrǵandarǵa shabýyl jasaý sheshimi tarıhı qadam boldy», — dedi Ulttyq qaýipsizdik mınıstri Itamar Ben-Gvır.
Qarjy mınıstri Betsalel Smotrıch terrorıster Izraıldiń uzyn quryǵynan qutyla almaıtynyn aıtty.
Osyǵan deıin Izraıldiń Doha shabýyly úshin jaýapkershilikti tolyq óz moınyna alǵany týraly jazdyq.