Netanıahý budan bylaı HAMAS-pen kelissózder tek oq astynda júrgiziletinin málimdedi

ASTANA. KAZINFORM – Izraıl premer-mınıstri Bınıamın Netanıahý halyqqa arnaǵan teledıdarlyq úndeýinde onyń úkimeti topty kepilge alynǵandardy bosatý boıynsha birneshe apta boıy sátsiz áreketterinen keıin HAMAS-qa qarsy qarqyndy kúresti qaıta bastaǵanyn málimdedi, dep habarlaıdy BBC. 

Joldaýdyń aldynda ol mınıstrler kabınetiniń shuǵyl otyrysyn shaqyrdy. 

Netanıahýdiń aıtýynsha, HAMAS merzimi 1 naýryzda aıaqtalǵan atysty toqtatý kelisimin uzartýǵa aıyrbas retinde 24-i áli tiri dep sanalatyn kepilge alynǵan 59 azamatty qaıtarý týraly birneshe usynysty qabyldaǵan joq. 

- Budan bylaı kelissózder tek oq astynda júrgiziletin bolady. Bul – tek bastamasy, - dedi premer-mınıstr. 

Izraıl ushaqtary seısenbige qaraǵan túni HAMAS ınfraqurylymyna jappaı soqqy berdi. 

Palestına tarapynyń málimetinshe, 400-ge jýyq beıbit turǵyn qaza tapqan. 

Netanıahý Izraıl endi HAMAS-qa qarsy áskerı operatsııalaryn kúsheıtetinin ýáde etti. 

Dál osy ýaqytta basqarýshy koalıtsııaǵa kiretin partııalardyń biri «Dinı sıonızm» Izraıl bıligine bir kepilge alynǵan birneshe palestınalyq tutqyndy bosatýǵa tyıym salatyn zań jobasyna bastamashy boldy.

Zań jobasynda sondaı-aq tiri palestınalyqtardyń kepilge alynǵandardyń máıitterine aıyrbastalmaıtyny da qarastyrylǵan. Izraıldik aqparat quraldarynyń habarlaýynsha, jaqyn arada Knessette zań jobasyna daýys berý kútilip otyr. 

Eske sala ketsek, seısenbi kúni tańerteń Izraıldiń Gaza sektorynyń bir bóligine jasaǵan áýe shabýylynan qaza tapqan palestınalyqtardyń sany 413-ke jetti. 

Izraıl Gazadaǵy HAMAS nysandaryna soqqy jasaýdy jalǵastyryp otyr.