«Nestle» kompanııasynyń ónimderi Qazaqstan naryǵynda kósh bastap tur
ALMATY. 23 mamyr. QazAqparat /Ádilet Musahaev/ - "Eýrazııa aımaǵy ishinde Qazaqstanda bizdiń kompanııanyń jumysy sátti damýda", - dedi «Nestle» kompanııasynyń Eýrazııa aımaǵy boıynsha basshysy Mark Potast kompanııanyń 2010 jylǵy qorytyndysy boıynsha arnaıy ótkizgen baspasóz máslıhatynda.
2010 jyly Eýrazııa aımaǵynda kompanııa ónimderiniń satylym kólemi 2009 jylǵa qaraǵanda 15 paıyzǵa ósip, 8,5 mıllıard rýbldi quraǵan. Mark Potasttyń aıtýynsha, 2010 jyly kompanııa óz tutynýshylaryn jańa ónimdermen qýantyp, marketıngtik zertteýler ótkize otyryp kompanııany Qazaqstan naryǵyndaǵy azyq-túlik salasynda jetekshi orynǵa shyǵarǵan. «Kofe salasynda onyń jańa túrlerin shyǵarý arqyly bizdiń kompanııa kósh bastap, Qazaqstan naryǵynyń 50 paıyzdy ıelenýde. Al, kondıter ónimderi boıynsha 20 paıyzdy jáne aspazdyq ónimder shyǵarýda 45% ıelenýde. Sonymen qatar sábılerge arnalǵan tamaq ónimderin óndirý boıynsha naryqtyń 45 paıyzǵa ıe. Bul bizdiń kompanııa ónimderiniń halyq kóńilinen shyǵyp, naryqta jetekshi orynǵa shyǵyp otyrǵandyǵyn kórsetedi», -deıdi M.Potast.
Kompanııa ókilderi kompanııanyń el ekonomıkasyna ǵana emes, sondaı-aq halyqtyń durys tamaqtanýyna da paıdasyn tıgizip otyrǵandyqtaryn aıtyp ótti. "Biz halyqty sapaly ónimmen qamtamasyz etýdi alǵa qoıamyz. Osy turǵyda kishkentaı búldirshinderge arnalǵan arnaıy sút ónimderin, halyqqa jaǵymdy jańa kofeler shyǵarýdamyz", -deıdi "Nestle nýtrıshn" kompanııasynyń Eýrazııa, Qazaqstan jáne Ortalyq Azııa aımaqtary boıynsha baǵyt jetekshisi Darııa Aıtmuhanova.
Sondaı-aq ol TMD quramyndaǵy memleketter batys elderine qaraǵanda kofeni az tutynatyndyǵyn aıtady. "Bul osy elderdiń burynnan shaıdy paıdalanǵandyǵynnan jáne qoǵamda kofeniń adam aǵzasyna tıgizetin zııany jaıynda jalǵan málimettiń taralýynan", -deıdi D.Aıtmuhanova.
