Nestlé, Danone jáne Lactalis ýytty zatqa baılanysty sút qospalaryn keri qaıtaryp jatyr

ASTANA. KAZINFORM – Nestlé, Danone jáne Lactalis kompanııalary ýytty tserýlıdpen lastaný qaýpine baılanysty balalarǵa arnalǵan sút qospalarynyń birqatar partııasyn álem boıynsha keri qaıtaryp alýǵa májbúr boldy, dep habarlaıdy Euronews.

Álemdegi eń iri úsh sút ónimderi kontserni anyqtalǵan tserýlıd lastanýynan keıin balalarǵa arnalǵan sút qospalarynyń iri partııalaryn naryqtan alyp tastady. Tserýlıd – qusý, ish ótý jáne ishtiń aýyrýyn týyndatýy múmkin ýytty zat.

Lastanýdyń kózi Qytaıdaǵy arahıdon qyshqyly (ARA) maıyn jetkizetin jalǵyz jetkizýshimen baılanysty. Bul komponent premıým sanattaǵy balalar taǵamy úshin asa mańyzdy ıngredıent sanalady.

Lactalis kompanııasy 18 elde taratylǵan Picot brendine tıesili balalar sút qospasynyń alty partııasyn keri qaıtaryp jatqanyn málimdegen sońǵy kompanııa boldy.

Atalǵan partııalar 2025 jylǵy qańtardan beri satylyp kelgen, jaramdylyq merzimi 2027 jylǵy naýryz aıyna deıin belgilengen.

«Habarlama alynǵannan keıin jáne tıisti ıngredıent jetkizýshisinen suratylǵan taldaýlarmen qatar, LNS (Lactalis Nutrition Santé) yqtımal áserge ushyraǵan ónimderdi baǵalaý úshin akkredıttelgen táýelsiz zerthanada testileýdi dereý bastady», – dedi Lactalis ókilderi.

Kompanııa bul aqparattyń jas balalary bar ata-analardy alańdatýy múmkin ekenin tolyq túsinetinin atap ótti. Sonymen qatar qazirgi kezeńde Frantsııa bıligi atalǵan ónimderdi tutynýǵa baılanysty shaǵymdar nemese ótinishter túspegenin habarlaǵan.

Danone kompanııasynda keri qaıtaryp alý aýqymy ázirge shekteýli. Sıngapýrdyń Azyq-túlik agenttiginiń suraýy boıynsha Taılandta óndirilgen bir ǵana partııa naryqqa shyǵarylmaı turyp alynyp tastalǵan.

Al Nestlé bul protsesti alǵashqylardyń biri bolyp bastap, Nıderlandtaǵy kásiporyndarynyń birinde lastaný anyqtalǵannan keıin 60-tan astam elde óz ónimderin keri qaıtaryp aldy.

Kompanııanyń erikti túrde júrgizgen keri qaıtaryp alý sharasy onyń tarıhyndaǵy eń aýqymdy naýqandardyń birine aınalyp, SMA, Beba, Guigoz jáne Alfamino brendterin qamtydy.

«Ónim qaýipsizdigi men barlyq sábılerdiń ál-aýqaty – bizdiń basty basymdyǵymyz», – dedi Nestlé kompanııasy keri qaıtaryp alý týraly habarlama jasaǵannan keıin.

«Bul jańalyq alańdaýshylyq týdyrýy múmkin ekenin túsinemiz jáne búkil protsess barysynda ata-analar men qamqorshylarǵa naqty ári ashyq aqparat berýge, sondaı-aq qoldaý kórsetýge mindettenemiz», – dep qosty kompanııa ókilderi.

Alaıda tutynýshylar quqyǵyn qorǵaý uıymdary bul protsestiń ashyqtyǵyna kúmán keltirip, Nestlé-ge qarsy quqyqtyq shaǵymdar túsirýdi josparlap otyrǵanyn málimdedi. Olar kompanııany ónimniń qadaǵalaný deńgeıiniń jetkiliksizdigi men jurtshylyqty der kezinde eskertpeý mindetin kesh oryndady dep aıyptady.

Foodwatch Netherlands júrgizgen zertteýge sáıkes, Nestlé máseleni alǵash ret 2025 jylǵy jeltoqsan aıynyń basynda rastaǵan. Alaıda ónimdi keri qaıtaryp alý týraly jarııa habarlamalar tek qańtardyń alǵashqy aptasynda ǵana jasalǵan.

Nestlé qazirgi ýaqytqa deıin atalǵan ónimderge baılanysty aýrý jaǵdaılary tirkelmegenin málimdedi.

Buǵan deıin Nestle ónimderi Qytaıda sapa baqylaýynan ótetini habarlanǵan bolatyn.