Nesipbek Aıtuly: Bul indetti jeńý úshin soǵystaǵy sekildi temirdeı tártip kerek

NUR-SULTAN. QazAqparat – Memlekettik syılyqtyń laýreaty, belgili aqyn Nesipbek Aıtuly el ishinde taraǵan indetke baılanysty halyqty sabyr men tártipke, baısaldylyqqa shaqyrdy, dep habarlaıdy QazAqparat tilshisi.

«Bul jaı qaraıtyn, beıqam otyratyn, áıteýir ótip ketedi ǵoı dep keńdikke salynatyn aýrý emes. Bul indet asa qaýipti – soǵyspen birdeı. Soǵysta qandaı temirdeı tártip bolatyn bolsa, bul indetpen kúreste de sondaı tártip kerek. Osyny Prezıdent barlyq oblys pen aýdan basshylaryna tapsyryp jatyr. Mundaıda tártipke baǵyný – eń basty nárse. Bir qumalaq bir qaryn maıdy shiritedi degendeı bir adam bul aýrýdy juqtyryp alsa, kórip otyrǵanyńyzdaı, aınalasyna túgel qaýip tóndiredi. Mine, osy máselege biz túsinistikpen el bolyp, jumǵan judyryqtaı bolyp, sabyrlyq pen baısaldylyq tanytyp, úreıge boı aldyrmaı, kúrese bilýimiz kerek», - deıdi QazAqparat tilshisine telefon arqyly bildirgen pikirinde.

Aqynnyń aıtýynsha, qazir ásirese jasy kelgen adamdar múmkindiginshe úıinen shyqpaı, esikti qymtap, bala-shaǵany oılaýy tıis.

«Qıynshylyqqa baılanysty Memleket basshysy keshe kóptegen áleýmettik sharanyń qolǵa alynatynyn jarııa etti. Áleýmettik jaǵdaıy tómen otbasylarǵa kómek kórsetip, shaǵyn bıznestiń salyq tóleıtin ýaqytyn sozyp, halyqty qoldaý tetikterin atady. Bul – úlken rıza qylarlyq kómek dep oılaımyn», - deıdi ol.

Nesipbek Aıtuly qazir halyqty indet bir qyssa, ekonomıkalyq daǵdarys ekinshi jaǵynan ońaı tımeýi múmkin ekenin aıtyp ótti. Aıtýynsha elde búgingi kúni osyndaı úreı bar.

«Ásirese qaltaly azamattar elge qarasýy kerek. Óz basym vırýstyń aýyl-aýylǵa tarap ketpeýin tilep otyrmyn. Halyqqa sabyr tileımin. Qazir kóptegen azamattyń tártip saqtamaı 15 kúnge qamalyp jatqanyn, kóshede beısaýat júrgenin estımin. Mundaıdy qoıý kerek. Halyqqa túsken náýbetten dáýlet kórip, maskany jappaı satyp alyp, qymbattata ótkizgen jaǵdaıdy da estidik, ókinishke qaraı. Osyndaı pıǵyldyń jolyn kesý kerek. Odan keıin eldi beıqamdyqqa shaqyryp, oıbaı bul jaı tumaý dep júrgen ánshisymaqtardy da shekteý kerek. Alla oń kózimen qarasyn bárimizge. Aqsaqaldar elge basý aıtýy kerek. Jastar sabyrly bolýy tıis. El bolyp etek-jeńimizdi qymtamasaq, kózge kórinbeıtin indet ana tesikten de, myna tesikten de kirip ketedi», - deıdi Nesipbek Aıtuly.

Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.