Nesip Júnisbaevtyń jańa kitaby 7,5 myń dana taralymmen jaryq kórdi
Qazaq sport jýrnalıstıkasynyń qoryna qosylǵan súbeli kitap 358 betten turady. 7,5 myń dana taralymmen basylyp shyqqan kitap mazmunyna myńnan asa túrli-tústi fotosýret engizilgen.
London olımpıadasyndaǵy eren jetistigimizdi qaıta bir eske túsiretin bul kitaptyń saltanatty tusaýkeser rásimi QR Mádenıet jáne sport mınıstrliginiń uıymdastyrýymen Almatyda 12 naýryz kúni Balýan Sholaq atyndaǵy sport saraıynda, al Astanada 17 naýryz kúni «Saryarqa» velotreginde ótedi.
Bul Nesip Júnisbaevtyń alǵashqy eńbegi emes. Onyń sport taqyrybyna arnalǵan onnan astam kitaby jaryq kórgen. «Úshinshi raýnd» (1980), «Aýyldan shyqqan alyptar» (1986), «Meksıkadaǵy fýtbol toıy» (1988), «Fýtbolmen tynystaǵan Ispanııa» (1989), «Olımpııskıı marshrýt» (1999, 2002) kitaptary jaryq kórgen.
N. Júnisbaev - Qazaqstandaǵy «Namys» tuńǵysh ulttyq fýtbol klýbyn uıymdastyrýshy. Álem sport jýrnalısteri qaýymdastyǵynyń múshesi jane Azııa sport jýrnalıster odaǵy atqarý komıtetiniń múshesi. Orys tilinde jazylǵan «Olımıııskıı marshrýt: Barselona - 92, Atlanta - 96, Nagano - 98» atty kitaby úshin 2000 jyly QR Prezıdenti N.Nazarbaevtyń Alǵys hatyn aldy.
«Jalyn» baspasy uıymdastyrǵan «Ákemniń qamshysy» (2002), «Namys jyrtar ul qaıda?» (2003) atty oı tolǵamdary jaryq kórgen.
Nesip Júnisbaev 1950 jyly 10 jeltoqsanda Taldyqorǵan oblysy Qaratal aýdany Kópbirlik aýylynda dúnıege kelgen. Jýrnalıst, jazýshy, toǵyzqumalaqtan Qazaqstannyń sport sheberi (1987), joǵary dárejeli tóreshi, Qazaqstannyń eńbek sińirgen jattyqtyrýshysy (1998). QazMÝ-dy (1975), Qazaq dene tárbıesi ınstıtýtyn (1995, qazirgi Qazaq memlekettik sport jáne týrızm akademııasy) bitirgen. 1975-1991 jyldary «Lenınshil jas» (qazirgi «Jas alash») gazetiniń bólim meńgerýshisi qyzmetin atqardy.. 1991-2013 jyldary «SPORT&ks» gazetiniń bas redaktory bolyp qyzmet etti.
Júnisbaev Nesip Qazaqstannyń toǵyzqumalaqtan ótken tuńǵysh spartakıadasynyń chempıony (1984). Respýblıkalyq toǵyzqumalaq federatsııasynyń tuńǵysh prezıdenti.