Nesıesin qaıtara almaı júrgender neni bilýi kerek
ASTANA. QazAqparat - QR Ulttyq banki kollektorlyq qyzmettiń boryshkerlermen jumys isteý barysyndaǵy negizgi qaǵıdalaryn eske saldy, dep habarlaıdy QazAqparat Banktiń baspasóz qyzmetine silteme jasap.
Kollektorlar boryshkerlerge tańǵy 08.00-den 21.00-ge deıin kúnine úsh ret qana habarlasa alady. Olarǵa apta ishinde 3 kezdesý ótkizýge ǵana ruqsat etilgen jáne tańǵy saǵat 08.00 men 21.00 aralyǵynda bir retten artyq kezdesýge tyıym salynǵan. Sondaı-aq, kezdesýdiń ýaqytyn boryshker belgileıdi. Jáne munyń barlyǵy jumys kúnderi ǵana júrgizilýi tıis, mereke jáne demalys kúnderi kez kelgen baılanysqa ruqsat etilmeıdi.
Kollektorlyq agenttikterge boryshkerdi óz mindetterin oryndaýǵa májbúrleýdiń kez kelgen tásilin qoldanýǵa zań júzinde tyıym salynady. Atap aıtqanda, jalǵan aqparat taratýǵa, ómirine qaýip tóndirýge, bopsalaýǵa, alaıaqtyq jasaýǵa, qaryzyn óteý úshin boryshkerden aqsha nemese múlik alýǵa, nesıe berýshiniń qupııasyn ashýǵa bolmaıdy.
Kollektorlyq agenttikterde iskerlik abyroı-bedeli taza, psıhodıspanser, narkodıspanser jáne týbdıspanserde esepke turmaǵan mamandar jumys isteýi kerek.
Sonymen birge, 2018 jyldyń 1 qańtaryndaǵy jaǵdaı boıynsha, Ulttyq banktiń eseptik tirkeýine 60 kollektorlyq agenttik ótken, olardyń basym bóligi Almaty qalasynda (34) tirkelgen.
