Nesıesi kollektorǵa ótip ketken turǵyndardyń qaryzy qaı jaǵdaıda keshiriledi

NUR-SULTAN. QazAqparat – Nesıe tarıhy kollektorlarǵa ótken turǵyndardyń boryshyn keshirý máselesi eki sanat boıynsha qaralady. Bul týraly QR Ulttyq bank tóraǵasynyń orynbasary Oleg Smolıakov Ortalyq kommýnıkatsııalar qyzmetinde ótken baspasóz konferentsııasyn aıtty.

«Nesıesi kollektorlarǵa ótip ketken azamattardyń máselesi eki sanat boıynsha qaralady. Birinshisi boıynsha, nesıe bank balansynan shyǵarylmaıdy. Kollektor qaryz alýshy men bank arasynda baılanys ornatyp, qaryzdyń qaıtýyna yqpal etedi. Ondaı nesıeler bank balansyna saqtalatyndyqtan, boryshyn keshirý aktsııasyna qatysa alady. Al nesıe bank balansynan shyǵarylyp, kollektorǵa satylǵan bolsa, ondaı nesıe ıeleri keshirimnen tys qalady. Kollektorlyq týraly zańnamada bank qaryz ıesiniń kelisimi bolǵan jaǵdaıda ǵana ony kollektorǵa ótkize alady. Kollektorǵa ótip ketken borysh ıesine bank budan keıin shaǵymdana almaıdy. Qazir isi kollektordyń qolynda jatqan qansha boryshker bar ekenin aıta almaımyn. Ondaı nesıelerdiń jalpy somasy birneshe ondaǵan mlrd teńgeden asady», - dedi Oleg Smolıakov.

Eske salsaq, QR Prezıdenti Qasym-Jomart Toqaev qazaqstandyqtardyń borysh júktemesin jeńildetý týraly Jarlyqqa qol qoıǵan bolatyn.

Búginge deıin borysh júktemesin jeńildetý boıynsha 507 myń qazaqstandyq anyqtalǵan.