Nesıesi bar qansha almatylyq ózin bankrot dep jarııalaı alady

ALMATY. QazAqparat - Almaty qalasynda 214 myń adam qarjy uıymdary aldyndaǵy nesıesin tóleı almaı júr. Bul týraly Almaty qalasy boıynsha MKD basshysynyń orynbasary Zańǵar Shyndalı Óńirlik kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshi.

«Aqparatqa sáıkes, búgingi kúni 214 myń jeke tulǵa qaryzdaryn ýaqytyly tóleı almaı júr. Biraq olardyń barlyǵy ózderin bankrot dep jarııa ete almaıdy. Olar kiris krıterııalaryna sáıkes kelýi kerek. Birinshiden, sottan tys bankrottyq bolsa múlki bolmaýy qajet. Ekinshiden, sot arqyly bolsa somasyn qaraý kerek»,- dedi Almaty qalasy boıynsha MKD basshysynyń orynbasary Zańǵar Shyndalı.
Sonymen qatar, ol jeke tulǵanyń qarjylyq jaǵdaıyna monıtorıng júrgiziletinin eske saldy.
Buǵan deıin QR Qarjy vıtse-mınıstri Senatta ótken dóńgelek ústel barysynda elimizde nesıe jáne basqa da qaryzyn tólemeı júrgen 7 mln boryshker bar ekenin aıtqan bolatyn.
Aıta keteıik, qazaqstandyqtar 2023 jyldyń 3 naýryzynan bastap bankrottyqqa ótinish bere alady.