Nesıeni zańsyz alý jáne maqsatsyz paıdalaný faktileri boıynsha qozǵalǵan qylmystardyń 30 paıyzdan astamy aýyl sharýashylyǵy salasyna tıesili

Bul týraly búgin ótken brıfıngte Qarjy polıtsııasynyń resmı ókili Murat Jumanbaı málim etti, dep habarlaıdy QazAqparat.

M.Jumanbaıdyń aıtýynsha, aýyl sharýashylyǵy salasynda nesıeler men sýbsıdııalardy zańsyz alý jáne maqsatsyz paıdalaný qylmystary memleketke 1 mıllıard 302 mıllıon teńge kóleminde zalal keltirgen jáne bul zańsyz alynyp, maqsatsyz paıdalanylǵan nesıe qarajattarynyń jalpy somasynyń 5 mlrd. 850 mln.teńgesin nemese 22 paıyzyn quraıdy.

Qarjy polıtsııasy organdary aýyl sharýashylyǵyna bólingen memlekettik nesıelerdi maqsatsyz paıdalanýdyń kóptegen faktilerin anyqtaǵan. Mysaly, Aqmola oblysyndaǵy «Dáýlet» aýylsharýashylyq tutyný kooperatıvi kókónis ósirýge arnalǵan arnaıy tehnıkany satyp alý syltaýymen «Agrarlyq nesıe korporatsııasy» AQ-dan 118 mıllıon teńge kóleminde nesıe alyp, ony maqsatsyz jumsaǵan. Atalmysh fakti boıynsha kásiporyn dırektoryna izdeý jarııalandy.

Resmı ókildiń sózine qaraǵanda, atalmysh sanattyǵy qylmystardyń basym bóligin memlekettik nesıeler men sýbsıdııalardy jalǵan qujattar tapsyrý arqyly zańsyz alý faktileri quraıdy. «Kepilzat retinde shyn máninde joq múliktiń qujattaryn tapsyrý - osyndaı qylmystardyń keń taraǵan ádisteriniń biri», - deıdi ol.

Mundaı zańsyzdyq jasaǵany úshin qylmystyq jaýapqa tartylǵandardyń arasynda Soltústik Qazaqstan oblysyndaǵy «Týraıa» JShS-nyń dırektory da bar. Ol basqa kásiporyndarmen jalǵan kelisimsharttarǵa otyryp, «Azyq-túlik kelisimshart korporatsııasynan 17,5 mıllıon teńgeden astam zaem alǵan.

Sondaı-aq M.Jumanbaıdyń aıtýynsha, bir kepilzat múlikti kórsetý arqyly qatarynan birneshe bankten nesıe alǵan qaskúnemder de bar. Sonymen birge, kepilzat múliktiń sany men sapasy týraly jalǵan aqparat berý arqyly nesıe alý - keń taraǵan zańsyzdyqtardyń qatarynan oryn alyp otyr.