Nesıelerdi «esepten shyǵaramyz» dep ýáde bergen alaıaqtarǵa sot úkimi shyqty

ASTANA. KAZINFORM  — Astana qalasynyń soty tutynýshylyq jáne avtonesıeleý salasyndaǵy aýqymdy alaıaqtyq shemasyna qatysy bar uıymdasqan qylmystyq top múshelerine qatysty aıyptaý úkimin shyǵardy. 

Toptyń uıymdastyrýshysy 9 jylǵa bas bostandyǵynan aıyrylsa, qalǵan qatysýshylar 6 jyldan 8 jylǵa deıin bas bostandyǵynan aıyrý jazasyna sottaldy.

— Alaıaqtar azamattarǵa qoldanystaǵy tutynýshylyq nesıelerdi «esepten shyǵarý» qyzmetin usynǵan. Onyń ornyna jábirlenýshilerge jańa kredıttik sharttar, sonyń ishinde avtonesıeler rásimdeýdi usynyp, aı saıynǵy tólemderdi ózderi tóleımiz dep ýáde bergen.

Bul shemanyń qurbandary áleýmettik turǵydan osal sanattaǵy azamattar — tabysy tómen tulǵalar men múmkindigi shekteýli jandar bolǵan. Qarjylyq jaǵdaıy qıyn bolǵandyqtan, jábirlenýshiler qaryz júktemesin jeńildetýge úmittenip, qaskóılerdiń sharttaryna kelisýge májbúr bolǵan, — delingen Astana qalasy prokýratýrasy habarlamasynda.

Alaıda berilgen ýádeler oryndalmaı, jábirlenýshilerge keltirilgen materıaldyq shyǵyn 240 mln teńgeden asty.

Úkim zańdy kúshine engen joq.

Aıta ketelik Prezıdent ınternettegi alaıaqtyq qylmystardyń besten biri ǵana ashylatynyn aıtqan edi.