Nesıe SMS kod arqyly rásimdeledi: Ulttyq bank qazaqstandyqtarǵa qaýip týraly eskertti
ASTANA. KAZINFORM – Ulttyq bank jalǵan qujattardy paıdalana otyryp jasalatyn, alaıaqtardyń óz «ókilettikterin» rastaý úshin «resmı blankilerdiń» nemese «qyzmettik kýálikterdiń» jalǵan túrlerin paıdalanatyn jaǵdaılarynyń jıilep ketkenin eskertedi.
— Alaıaqtar aqshalaı qarajatty jymqyrý maqsatynda messendjerler (WhatsApp nemese Telegram) arqyly azamattarǵa qońyraý shalyp, ózderin Ulttyq banktiń jáne basqa da memlekettik organdardyń qyzmetkerleri retinde tanystyrady. Buǵan qosa, profıliniń shynaıy ekenine adamdardy sendirý úshin messendjerde vedomstvolardyń resmı resýrstaryndaǵy sýretter men emblemalardy paıdalanady, «resmı blankilerdegi» jalǵan qujattardy, ashyq derek kózderinen alynǵan birinshi basshylardyń mórleri men qoldary qoıylǵan anyqtamalardy, qyzmettik kýálikterdi jiberedi, — delingen bank habarlamasynda.
Qaskóıler jalǵan qujattardy paıdalanyp, aldaý jáne psıhologııalyq qysym kórsetý arqyly azamattardyń senimine kirip, adamdarǵa oılanýǵa mursha bermeı, sodan keıin belgisiz bireýlerdiń kredıt resimdegeli jatqany nemese qazirgi ýaqytta resimdeıtini týraly habarlaıdy.
Sonymen qatar, alaıaqtyqtyń aldyn alýǵa nemese «eski kredıtterdi esepten shyǵarýǵa kómektesýdi syltaýrata otyryp, aldanyp qalǵan azamattarǵa mıkrokredıtter nemese qaryz resimdeıdi. Bul maqsatta teris alaıaqtar memlekettik portaldardan ne ekinshi deńgeıdegi bankterden kelip túsken SMS-kodtardy suratady.
— Olar ózderin Ulttyq banktiń qyzmetkerleri retinde tanystyryp, jalǵan hat jiberedi, hatta jiberýshiniń shet tilindegi qujattardy salýyna baılanysty onyń atyna aqsha aýdarýdy toqtata turatyny týraly habarlaıdy jáne olar osy «aýdarylatyn aqshany» alý úshin qujattardyń resmı aýdarý aqysyn tóleýdi usynady, aqsha aýdarylǵannan keıin keri qaıtarylady dep sendiredi, — dedi bankte.
Osy aıtylǵandardy eskere otyryp, Ulttyq bank azamattardy qyraǵy bolýǵa, belgisiz tulǵalardan kelip túsken qujattardy jáne qońyraýlardy tekserýge, SMS-kodtardy, jeke jáne derbes derekterdi jibermeýge, sondaı-aq úshinshi tulǵalarǵa aqsha aýdarmaýǵa shaqyrady.
— Ulttyq bank qyzmetkerleri aýdıo jáne beıneqońyraýlar shalmaıtynyn, jeke tulǵalardyń shottaryna qyzmet kórsetpeıtinin, túrli ınvestıtsııalyq paı qorlary men qarjy ónimderine qarjylyq salym salýdy usynbaıtynyn, aqshalaı qarajatty saqtandyrýmen aınalyspaıtynyn, sondaı-aq halyqpen aqshalaı esep aıyrysý júrgizbeıtinin eske salamyz. Eger siz alaıaqtardyń arbaýyna tap bolsańyz, quqyq qorǵaý organdaryna tıisti ótinishpen júginýge keńes beremiz. Konsýltatsııa alý úshin 1477 qysqa nómiri boıynsha Ulttyq banktiń baılanys ortalyǵyna habarlasýǵa bolady, — delingen habarlamada.
Aıta ketelik pıramıdalar, «tiske ketken» mıllıardtar, blogerler bylyǵy - 2025 jylǵy eń iri qarjylyq alaıaqtyqtar týraly jazǵan edik.