Nesıe úshin adam urlaǵan: Aqmola oblysyndaǵy uıymdasqan qylmystyq top isiniń mán-jaıy anyqtaldy
ASTANA.KAZINFORM — Áleýmettik jaǵynan osal adamdardy urlap, olardyń atyna iri kólemde bankten nesıe alǵan uıymdasqan qylmystyq topqa qatysty qylmystyq is Aqmola oblysynyń qylmystyq ister jónindegi mamandandyrylǵan aýdanaralyq sotyna jiberiledi, dep habarlaıdy Kazinform agenttiginiń menshikti tilshisi.
Aqmola oblysy prokýratýrasynyń redaktsııa saýalyna bergen jaýabyna sáıkes, qazir áleýmettik jaǵynan osal adamdardy urlaý, alaıaqtyq jáne aqsha jylystatý boıynsha uıymdasqan qylmystyq topqa qatysty qylmystyq is aıaqtaldy.
— Qazaqstan Respýblıkasy Qylmystyq is júrgizý kodeksiniń 294-297 baptaryna sáıkes qylmystyq is materıaldary qylmystyq protseske qatysýshylarǵa tanysý úshin jiberildi. Qaraý aıaqtalǵannan keıin qylmystyq is óz quzyretine sáıkes Aqmola oblysynyń qylmystyq ister jónindegi mamandandyrylǵan aýdanaralyq sotyna joldanady, — delingen vedomstvo málimdemesinde.
Tergeý aıasynda barlyǵy 25 tulǵaǵa QR Qylmystyq kodeksiniń túrli baptary boıynsha aıyp taǵyldy.
Qazaqstan Respýblıkasy Qylmystyq kodeksiniń 190-baby 4-bóliginiń 1 jáne 2-tarmaqtary (qylmystyq top jasaǵan asa iri kólemdegi alaıaqtyq) jáne 262-babynyń 1 jáne 2-bóligi (uıymdasqan top qurý, basshylyq etý, oǵan qatysý) boıynsha 21 tulǵa sotqa tartylady. Úsh tulǵaǵa Qylmystyq kodekstiń 218-baby 3-bóliginiń 2 jáne 3-tarmaqtary boıynsha (Qylmystyq jolmen alynǵan múlikti jylystatý) qosymsha aıyp taǵyldy. Úsh kúdiktiniń ústinen 190-bap boıynsha aıyp taǵyldy. Prokýratýra olarǵa qatysty qylmystyq is QR Qylmystyq kodeksiniń 247-baby (zańsyz syıaqy alý) boıynsha ońaltýǵa jatpaıtyn negizder boıynsha toqtatylǵanyn qosty.
Sonymen qatar, Qazaqstan Respýblıkasy Qylmystyq kodeksiniń 190-babynyń 4-bóliginiń 1 jáne 2-tarmaqtarymen jáne 262-babynyń 2-bóligimen bir kúdiktige qatysty qylmystyq is halyqaralyq izdeý jarııalanǵanyna baılanysty jeke óndiriske bólingen.
Eske sala keteıik, Aqmola oblysynyń prokýrorlary 450 tulǵaǵa zańsyz nesıe rásimdegen uıymdasqan qylmystyq toptyń áreketin toqtatqanyn jazǵan edik.
Aqmola oblysynyń prokýrorlary áleýmettik az qamtylǵan azamattardy urlap, olardyń atyna iri kólemde bankten nesıe alǵan uıymdasqan qylmystyq topqa qatysty tergeýdi aıaqtady.
Osydan keıin Kaspi Bank, Forte Bank, Eurasian Bank jáne Alatau City Bank birlesken málimdeme jasap, uıymdasqan qylmystyq topqa óz qyzmetkerleriniń qatysy barynan beıhabar ekenin málimdedi.
Biraq Qazaqstan qarjygerler qaýymdastyǵy bank qyzmetkerleriniń uıymdasqan qylmystyq topqa qatysy joqtyǵyn joqqa shyǵarǵan soń, Aqmola oblysynyń prokýratýrasy taraǵan aqparattyń barlyǵy naqty is materıaldaryna negizdelgenin málimdedi.