Nesıe tólemi - 395 myń teńge, jalaqysy - 220 myń teńge: kópbalaly ana bankterdi sotqa berdi
TARAZ. KAZINFORM – Kámeletke tolmaǵan tórt balanyń anasy, Taraz qalasynyń turǵyny bes bankten 6 mıllıon teńgeden astam tutynýshylyq qaryz jınap, sotqa júgindi. Bul týraly Joǵarǵy sot málim etti.
Talapkerdiń aıtýynsha, ol JShS-niń birinde operator bolyp jumys isteıdi, jalaqysy – 220 myń teńge. Alaıda aı saıynǵy nesıelik tólemder kólemi 395 myń teńgege jetip, onyń tabysynan edáýir asyp túsken.
Sonymen qatar, áıel otbasyn qamtamasyz etý shyǵyndaryn da óz moınyna alǵan.
- Nesıe júktemesiniń shamadan tys ekenin alǵa tartqan kóp balaly ana sottan aı saıynǵy tólemderdi azaıtyp, qaryzdy óteý merzimin 60 aıǵa deıin uzartýdy surady. Alaıda bes banktiń tórteýi bul talapqa qarsy boldy, - delingen jazbada.
Taraz qalalyq soty isti qaraý barysynda talap qoıýshynyń ýájderi naqty dáleldermen rastalǵanyn jáne onyń áreketterinen aram nıet baıqalmaǵanyn anyqtady. Osyǵan baılanysty sot tólem qabilettiligin qalpyna keltirý rásimin qoldaný týraly sheshim shyǵardy. Jańa tártipke saı, qaryz 5 jyl ishinde aı saıyn tólenetin bolady.
Sot sheshimine eki bank shaǵym túsirgenimen, Jambyl oblystyq soty alǵashqy ınstantsııanyń sheshimin ózgerissiz qaldyrdy.
Sot aktileri zańdy kúshine endi.
Aıta keteıik, elimizde sıyr men qoı satyp alatyndarǵa 5 paıyzdyq nesıe beriledi.