Nesıe seriktestikteriniń IV forýmy: mańǵystaýlyq kásipker Agrarlyq nesıe korporatsııasy arqyly sharýa qojalyǵyn úlkeıtti

AQTAÝ. QazAqparat – Mańǵystaýlyq kásipker Agrarlyq nesıe korporatsııasynan nesıe alyp, qojalyǵyn úlkeıtti. Tórt túlik ósirýmen aınalysatyn sharýa mal bordaqylaý alańyn ashqan. Qojalyqtyń tynys-tirshiligi Aqtaý qalasynda ótken Nesıe seriktestikteriniń IV forýmynda tanystyryldy, dep habarlaıdy QazAqparat tilshisi.

Aqtaý qalasynyń janyndaǵy «Aqjol» sharýa qojylyǵy Agrarlyq nesıe korporatsııasynyń tıimdi qarjylandyrý tetikterin iske asyrý nátıjesinde kásibin damytyp otyr.

«Ótken jyly óńirdegi «Munaıly nesıe» seriktestigi arqyly 33 mln teńge alyp, arnaıy tehnıkaǵa qol jetkizdik. Qalǵanyna 20 bas qulyndy bıe, 3 botaly túıe aldyq. Byltyr Mańǵystaýda qýańshylyq boldy. Sondyqtan, Aqtóbe oblysynan jerdi jalǵa alyp, jylqyny sol jaqqa apardyq», - deıdi sharýashylyq basshysy Bolat Esenálıev.

Kásipker 2015 jyly mal bordaqylaý keshenin jasaqtaǵan. Onda 8 adam jumys isteıdi. Et, sút ónimderin satyp, paıda taýyp otyr. Qojalyqta 300-ge tarta iri qara, 200-deı usaq mal bar. Aýlada úırek pen qaz ósirip otyr. Jyl saıyn 100 bas iri qara, 100 bas qoıdy bordaqylap, Aqtaýdaǵy bazarlarǵa etke ótkizedi.

Aqtaýda ótip jatqan forýmda Agrarlyq nesıe korporatsııasy men nesıe seriktestikteriniń bıznes úderisterin jetildirý strategııasy men ońtaılandyrý jaǵdaılary talqylandy. Oǵan elimizdegi 140-taı nesıe seriktestiginiń basshylary, «Báıterek» holdınginiń, Korporatsııanyń, sheteldik nesıe kooperatsııasynyń ókilderi qatysty.

Forýmda sóz alǵan «Agrarlyq nesıe korporatsııasy» AQ basqarma tóraǵasy Almat Áshirbekov: «Birinshi jartyjyldyqta 7 myńnan astam sharýaǵa 182,5 mlrd teńge bólingen. Onyń 43%-i, ıaǵnı 78,8 mlrd teńge, nesıe seriktestikteri arqyly berildi. Osy jyly nesıe seriktestikterine - 129 mlrd teńge, kelesi jyly - 140 mlrd teńgege deıin qarajat berilýi josparlanǵan», - dedi.

Jalpy, Mańǵystaýda úsh nesıe seriktestigi jumys isteıdi. Sonyń biri - 140-tan asa múshesi bar «Munaıly nesıe» JShS. Qarjy ınstıtýty jyl basynan beri 344,3 mln teńgeden asatyn 18 jobany qarjylandyrǵan.

«Elimizde 206 nesıe seriktestigi jumys isteıdi, olar 23,5 myń sharýashylyqty biriktirip otyr. Forým – solardyń basqosýy, máselelerdi talqylaý, damý úderisindegi jańa strategııalyq baǵyttardy aıqyndaý maqsatynda uıymdastyrylyp otyr», - deıdi AÓK Nesıe seriktestikteri qaýymdastyǵynyń basqarma tóraıymy Almıra Saǵatova.