Nesıe resimdegende qosa qaryz alýshy qandaı jaýapkershilik arqalaıdy
ASTANA. KAZINFORM — Qosa qaryz alýshy — qaryz alýshymen birge kredıt shartyna qol qoıatyn jáne onyń oryndalýyna ortaq jaýapkershilik alatyn tulǵa, dep habarlaıdy Qarjy naryǵyn retteý jáne damytý agenttigi.
Bul qaryz alýshy qaryzdy ótemegen jaǵdaıda bank qosa qaryz alýshydan mindettemelerdi tolyq nemese ishinara oryndaýdy talap etýge quqyly ekenin bildiredi
Ádette, qosa qaryz alýshyny ıpoteka resimdeý kezinde qaryz alýshynyń bankten maquldaý alýy úshin kirisi jetkiliksiz bolǵan kezde tartady.
Nátıjesinde qaryz alýshy men qosa qaryz alýshynyń kiristeri qosylady, bul kredıtti maquldaý múmkindigin arttyrady. Alaıda, qosa qaryz alýshynyń jaýapkershiligi qaryz alýshynyń jaýapkershiligine teń bolady: tólem merzimin ótkizgen jaǵdaıda bank qarajatty onyń kez-kelgen shottarynan esepten shyǵara alady, múlkin óndirip alady nemese sotqa júgine alady.
Kepilgerden (kepildik berýshiden) aıyrmashylyǵy, qosa qaryz alýshynyń tabysy kredıt somasyn esepteý kezinde eskeriledi. Bul rette qosa qaryz alýshynyń táýekelderi joǵary bolady: ol qaryzdy belgilengen kepildik sheginde ǵana emes, tolyq kólemde óteýge mindettenedi.
Qosa qaryz alýshy nelerdi bilýge tıis?
Kredıttik mámilege qatysýǵa kelisim bermes buryn mynalardy:
- shart talaptaryn muqııat zerdeleý;
- qaryz alýshynyń tólem qabiletsizdigi jaǵdaıynda qaryzdy óteý úshin qarjylyq múmkindigin baǵaýy;
- birneshe qosa qaryz alýshylar bolsa da shart tolyǵymen oryndalǵanǵa deıin mindettemelerdiń saqtalatynyn eskerý mańyzdy.
Qosa qaryz alýshy bolýǵa kelispes buryn, barlyq táýekelderdi muqııat baǵalaý qajet.
Táýekelderge tıisinshe baǵa bermeı basqa adamǵa kredıt resimdeýge qatysý kúrdeli qarjylyq saldarǵa ákelýi múmkin.
Buǵan deıin bankterge klıent quqyqtaryn saqtaý boıynsha jańa talaptar engizilgenin jazǵanbyz.