Nesıe naryǵy jazdaǵy «karantınnen» qalaı ótti
NUR-SULTAN. QazAqparat - Jaz aılary nesıe naryǵy úshin barynsha kúrdeli boldy, dep habarlaıdy QazAqparat tilshisi.
Ranking.kz málimetinshe, nesıe naryǵy eki aı qatarynan, naqty aıtqanda maýsymda 0,5, al shildede 0,9 paıyz teris mánge ketti. Tek tamyzda ǵana 2,2 paıyz ósim boldy. Qyrkúıektiń 1-inde Qazaqstannyń ekinshi deńgeıli bankteriniń jıyntyq nesıe qorjyny 15,18 trln teńge boldy. Bul kórsetkish osy jyldyń 1 maýsymynda 15,07 trln teńge bolǵan edi. Qorytyndysynda kúzde bank zaımdarynyń ósimi jazdyń basymen salystyrǵanda 0,8 paıyzdy qurady.
10 iri bank-kredıtorlardyń arasynda jazdaǵy «karantın» qorytyndysy boıynsha Turǵynúıqurylysjınaqbanki úzdik kórsetkishke qol jetkizdi. Qarjy ınstıtýtynyń nesıe qorjyny úsh aıdyń ishinde osy jyldyń 1 qyrkúıegine qaraı 13,3 paıyzǵa, 1,19 trln teńgege deıin ósti. Kórsetkish turaqty artyp otyrdy. Atap aıtqanda, jyl ishinde TÚQJB qorjyny birden 33,4 paıyzǵa artty. Bul sektordaǵy eń kúshti kórsetkish sanalady.
Sonymen qatar jaz aılarynda Bank RBK RBK (plıýs 8%, 485 mlrd teńgege deıin) jáne Halyq banki (plıýs 4,5%, 4,74 trln teńgege deıin) nesıe berýi artty. Osylaısha, nesıe naryǵyna ortaq problema kezinde jazdaǵy daǵdarystan ıpotekalyq nesıeleý ǵana qarqyndy ósim kórsetip otyrǵan segment bolyp qaldy.
Aıta keterligi, Memleket basshysynyń tapsyrmasyna sáıkes, elimizde «Nurly jer» memlekettik baǵdarlamasy aıasynda «Shańyraq» jobasy iske qosyldy. Turǵyn úı satyp alýǵa jeńildik usynatyn zaım jyldyq 5 paıyz mólsherlememen 20 jylǵa beriledi. Bastapqy jarna baspana qunynyń 10 paıyzyn quraıdy. Joba operatory - Turǵynúıqurylysjınaqbanki. 2020 jyly jobany júzege asyrý úshin QR Ulttyq bankiniń enshiles uıymy 210 mlrd teńge bólýdi josparlap otyr. Onyń 90 mlrd teńgeni quraıtyn alǵashqy bóligi atalǵan bankke jiberilgen.
