Nesıe qandaı jaǵdaıda keshiriledi – Іshki ister mınıstrliginiń jaýaby

Іshki ister mınıstriniń orynbasary Igor Lepeha qandaı jaǵdaıda qazaqstandyqtar atyna alaıaqtar rásimdegen nesıe tolyq keshiriletinin túsindirdi, dep habarlaıdy Kazinform.

Onyń aıtýynsha, alaıaqtardan zardap shekken turǵyndar Іshki ister mınıstrligine jıi júginedi. Qolda bar ókilettikter sheńberinde ІІM tergeýshileri bank mekemelerine tıisti usynymdar engizedi, sonyń negizinde azamattarǵa mundaı kredıtter boıynsha tólemder men esepteýler ýaqytsha toqtatylady, biraq bul ýaqytsha shara ǵana.

«Ulttyq bank bekitken «Elektrondy tásilmen mıkrokredıtter berý qaǵıdalarynyń» 15-tarmaǵyna sáıkes, kredıtterdi tolyq esepten shyǵarýǵa úshinshi tulǵalar tarapynan ruqsat etilmegen is-áreketter, ıaǵnı klıentke kredıtti rásimdeý kezinde onyń qatysýynsyz júıeni buzý bolsa ǵana jol beriledi. Internettegi alaıaqtyq týraly qylmystyq isterdi tergeý kezinde bizde mundaı faktiler anyqtalǵan joq. Barlyq qylmystarǵa jábirlenýshilerdiń sengishtigi sebep bolǵan», - dedi Igor Lepeha Parlament tyńdaýynda.

Polıtseı atap ótkendeı, Ulttyq bank tamyz aıynda engizgen azamattardyń nesıe alýdan erikti túrde bas tartý qyzmeti mundaı jaǵdaılardyń aldyn alýǵa kómektesedi.

Sonymen birge I. Lepeha halyqty shamadan tys nesıelendirýge jol bermeý úshin basqa shekteýlerdi qabyldaý qajettigin aıtty.

Aıta keteıik, búgin Májiliste «Halyqtyń shamadan tys kredıt alýyn azaıtý jáne qarjy saýattylyǵyn arttyrý» taqyrybynda Parlament tyńdaýy ótti.

Qaryz alýshylardyń quqyǵyn qorǵaýdy kúsheıtý boıynsha zańnamalyq túzetýler pysyqtalyp jatyr.