Nesıe alýǵa «Stop-kredıt» qoıǵandar qandaı qaryzdardy báribir rásimdeı alady
ASTANA. KAZINFORM — Qazaqstanda azamattarǵa banktik qaryzdar men mıkrokredıtter alýdan erikti túrde bas tartýǵa múmkindik beretin «Stop-kredıt» qyzmeti jumys isteıdi. Alaıda bul tetik barlyq jaǵdaıda birdeı qoldanylmaıdy. Qarjy naryǵyn retteý jáne damytý agenttigi «Stop-kredıtke» qatysty negizgi erekshelikterdi túsindirdi.
«Stop-kredıt» qosylǵan kezde bank nemese mıkroqarjy uıymy azamatqa qaryz berýden bas tartýǵa mindetti. Degenmen zańnamada bul shekteý qoldanylmaıtyn birqatar jaǵdaı qarastyrylǵan.
«Stop-kredıt» bank qaryzdaryna qatysty myna jaǵdaılarda qoldanylmaıdy:
-
tutynýshylyq qaryzdyń somasy tikeleı taýardy, jumysty nemese kórsetiletin qyzmetti satýshynyń shotyna aýdarylsa jáne qaryz alýshy taýardy, jumysty nemese qyzmetti alǵanyn rastasa. Bul — taýarlyq kredıt;
-
qaryz sol banktegi basqa bereshekti óteý úshin berilse, ıaǵnı ishki qaıta qarjylandyrý kezinde;
-
tólem kartasy boıynsha 150 AEK-ten (648 750 teńge) aspaıtyn kredıttik lımıt sheńberinde qaryz berilse. Bul lımıt taýarlar men qyzmetterdi tóleýge arnalǵan jańartylatyn kredıttik lımıt bolýy kerek;
-
qaryz qarajaty tek salyqtardy, aıyppuldardy nemese atqarýshylyq is júrgizý boıynsha bereshekti tóleýge maqsatty túrde aýdarylsa.
Mıkrokredıtter boıynsha da birqatar erekshelik bar.
«Stop-kredıt» qosylǵanyna qaramastan, mıkroqarjy uıymy:
-
taýarlar, jumystar nemese kórsetiletin qyzmetter úshin aqshany tikeleı satýshyǵa nemese ónim berýshige aýdarýǵa;
-
sol mıkroqarjy uıymyndaǵy burynǵy bereshekti qaıta qarjylandyrýǵa;
-
salyqtardy, aıyppuldardy jáne atqarýshylyq is júrgizý boıynsha bereshekti óteýge mıkrokredıt berýge quqyly.
Sonymen qatar lombardtar beretin mıkrokredıtterge «Stop-kredıt» tetigi qoldanylmaıdy.
«Stop-kredıt» buzylyp, nesıe berilse ne bolady?
Eger bank nemese mıkroqarjy uıymy «Stop-kredıt» talabyn buzyp, banktik qaryz nemese mıkrokredıt berse, qarjy uıymy zańda kózdelgen sharalardy qabyldaýǵa mindetti.
Atap aıtqanda, nesıe boıynsha bereshý esepten shyǵarylýy, qaryz alýshynyń kredıttik tarıhyna tıisti túzetý engizilýi jáne odan óndirip alynǵan qarajat qaıtarylýy tıis.
Qarjy naryǵyn retteý jáne damytý agenttigi «Stop-kredıt» tetigi bank pen mıkroqarjy uıymdary qaryz berý kezinde oryndaýǵa mindetti basqa talaptardyń kúshin joımaıtynyn atap ótti.
Eske salaıyq, buǵan deıin «Stop-kredıt» qyzmetin 6,3 mln adam paıdalanǵanyn habarlaǵan edik.
