«Nesat» taıfýnynyń saldarynan Haınan provıntsııasynyń 300 000 turǵyny kóshirildi
BEIJІŃ. 30 qyrkúıek. QazAqparat /Rýslan Súleımenov/ - Beısenbi kúni, 29 qyrkúıekte QHR-diń Haınan provıntsııasyndaǵy qýatty «Nesat» taıfýnynyń saldarynan 300 000 jergilikti turǵyn kóshirildi.
Provıntsııada joıqyn daýyldyń sebebinen kemeler aılaqqa qaıtyryldy, ushýlar jáne parom tasymaldary toqtatyldy jáne mektepter jabyldy.
Daýyldyń kindiginde jeldiń kúshi 14 ball bolyp, jeldiń ekpini sekýndyna 42 metrge jetti.
Taıfýn beısenbi kúni Gýandýn provıntsııasyna jetti, tabıǵat apaty saldarynan Gýansı-Chjýan avtonomııalyq aýdanynda 3000-nan astam mektep jabyldy.
Taıfýn apaty jaqyndap kele jatqan Sıanganda qor bırjasy, sot organdary, mektepter, balabaqshalar, qart adamdarǵa kómek ortalyqtary men klınıkalyq aýrýhanalar jabyldy. Munda trolleıbýstar, aspaly joldar jáne Sıangan aralyn jalǵastyratyn parom qatynasy toqtatyldy.
«Nesat» taıfýnynan Fılıppınde 35 adam mert boldy.
