Nepalǵa kelgen apat: eldi qalpyna keltirýge 4,78 mlrd dollar kerek
ASTANA. KAZINFORM — Nepalda 26 tamyzda Qytaı shekarasyna jaqyn ornalasqan Rasýva aýdanynda jáne oǵan irgeles aýmaqtarda bolǵan sý tasqynynan keıin eldi qalpyna keltirýge shamamen 4,78 mlrd dollar qajet. Tabıǵı apat saldarynan 1385 adam qaza tapqan, dep habarlaıdy Anadoly.
Nepal Syrtqy ister mınıstrligi eldegi sý tasqynynyń ekonomıkalyq saldary týraly jazbasha málimdeme jarııalady.
Málimdemede sý tasqynynan kelgen jalpy shyǵyn shamamen 1,8 mlrd dollardy, al boljamdy ekonomıkalyq zalal 883 mln dollardy quraıtyny aıtylǵan.
Eldi qalpyna keltirýge qajetti qarajattyń jalpy kólemi shamamen 4,78 mlrd dollar dep baǵalanyp otyr. Onyń ishinde 57,67 mln dollar aldaǵy alty aıda, al shamamen 4,71 mlrd dollar uzaq merzimdi qalpyna keltirý jumystaryna qajet bolady.
Nepaldyń Tabıǵı apattar qaýpin azaıtý jáne olardy basqarý ulttyq agenttiginiń málimetinshe, sý tasqynynan qaza tapqandar sany 1385 adamǵa jetken. Sonymen qatar habar-osharsyz ketken 5130 adamdy izdeý-qutqarý jumystary jalǵasyp jatyr.
Sý tasqyny kezinde 13 676 adam qutqarylǵan. Jaraqat alǵan 337 adamǵa medıtsınalyq kómek kórsetildi.
Sarapshylar muzdyqtyń opyrylýy sebep bolýy múmkin ekenin aıtty
26 tamyzda Rasýva aýdanynda bolǵan sý tasqyny saldarynan ondaǵan kópir qırap, joldar búlingen. Іzdeý-qutqarý jumystaryn júrgizý úshin aımaqqa tikushaqtar jiberildi.
AQSh Geologııalyq qyzmeti (USGS) bastapqyda óńirde sý tasqyny aldynda jer silkinisi bolǵanyn habarlaǵan. Keıin derekterin jańartyp, magnıtýdasy 5,2 bolǵan seısmıkalyq qubylysqa muzdyqtyń opyrylýy sebep bolǵanyn málimdedi.
Katmandýda ornalasqan Taýly aımaqtardy damytý jónindegi halyqaralyq ortalyqtyń sarapshylary sý tasqyny osy óńirdegi taý massıvinen muzdyq bólikteriniń úzilip túsýinen bolǵan kóshkin saldarynan paıda bolǵanyn aıtty.
Osyǵan deıin Nepaldaǵy joıqyn tasqyn ǵaryshtan túsirilgenin jazǵan edik.
Sonymen qatar BUU Nepaldaǵy sý tasqynynan zardap shekkenderge kómek kórsetý úshin 49,6 mln dollar surady.
