Nepaldaǵy jer silkinisi saldarynan zardap shekken qazaqstandyqtar týraly aqparat joq - QR SІM
ASTANA. QazAqparat - Nepaldaǵy kezekti kúshti jer silkinisinen keıin zardap shekken Qazaqstan azamattary týraly aqparat joq. Bul týraly Tvıtterdegi paraqshasynda QR SІM resmı ókili - erekshe tapsyrmalar jónindegi elshi Altaı Ábıbýllaev habarlady.
Sonymen birge ol keshe Úndistanda bolǵan jol-kólik oqıǵasynda zardap shekkenderdiń arasynda qazaqstandyqtardyń bolmaǵandyǵy týraly aqparat tekserilip jatqanyn habarlady.
Eske sala keteıik, Úndistannyń soltústiginde jolaýshylar avtobýsymen bolǵan jol-kólik oqıǵasynyń saldarynan 23 adam qaza tapty, 35-i zardap shekti. Aldyn ala málimetter boıynsha, avtobýs júrgizýshisi rýldi basqara almaı qalǵan. Kólik quraly joldan shyǵyp ketip, bıiktigi 60 metrden asatyn shatqalǵa qulady.
Taǵy bir iri jol-kólik oqıǵasy Egıpette boldy. Reseı jáne Ýkraına azamattary mingen avtobýs Hargada - Ras-Garıb kúrejolynyń 40-shy shaqyrymynda apatqa ushyrady. Ol júk mashınasymen soqtyǵysyp, aýdaryldy. QR SІM málimetteri boıynsha, osy jol-kólik apaty saldarynan qazaqstandyqtar zardap shekken joq.
