Nepaldaǵy jer silkinisi qurbandarynyń sany 7 myńnan asty
ASTANA. QazAqparat - Ótken aptada Nepalda bolǵan joıqyn jer silkinisiniń qurbandary sany 7 myń adamnan asty, dep habarlady RIA Novostı eldiń Tótenshe jaǵdaılar jónindegi jedel ortalyǵyna silteme jasap.
Budan buryn 6621 adamnyń kóz jumyp, 14023-iniń zardap shekkeni habarlanǵan bolatyn.
Senbi kúniniń málimetteri boıynsha «qurbandar sany 7045 adamǵa jetti, 14397 adam jaraqattanǵan» dep habarlady CNN telearnasy Nepaldyń tótenshe jaǵdaılar jónindegi jedel ortalyǵyna silteme jasap.
Nepal bıligi úıindi astynan tiri qalǵandardy tabýǵa úmitin úzip otyr. «Eger biz tiri alǵan bireýlerdi taýyp alsaq, keremet bolar edi. Biraq ta biz olardy izdestirýdi odan ári jalǵastyramyz», - dep telearna jergilikti ІІM ókili Laksmı Dhakaldyń málimdemesin keltirgen.
Nepalda terbelisi 7,9 ballǵa jetken joıqyn zilzala 25 sáýir kúni tańerteń boldy. Onyń kindigi el astanasy Katmandýdan soltústik-batysqa qaraı 82 shaqyrym jerde, 15 shaqyrym tereńdikte boldy. Budan keıin kúndiz Nepalda birneshe jerasty dúmpýi bolyp, onyń eń qýattysynyń kúshi 6,7 ballǵa jetti.
