Nepaldaǵy túrmeden 1500 tutqyn qashyp ketken

ASTANA. KAZINFORM — Nepaldyń Lalıtpýr qalasyndaǵy Nakhý túrmesinen 1500-ge jýyq tutqyn qashyp ketti, dep habarlaıdy AZERTADJ Nepaldyń Khabarhab aqparattyq kanalyna silteme jasap.

Málimetke sáıkes, barlyq sottalǵandar túrme kúzetshileri óz posttaryn tastap ketkennen keıin qashyp shyqqan.

Ótken apta sońynda Nepal bıligi keıbir iri áleýmettik jelilerdiń eldegi qyzmetin ýaqytsha toqtatqan bolatyn. Sebebi olar belgilengen merzimde Baılanys jáne aqparattyq tehnologııalar mınıstrliginde tirkeýden ótpegen.

Bul talap áleýmettik jelilerdi retteýge baǵyttalǵan keń aýqymdy saıasattyń bir bóligi sanalady. Alaıda qarsy taraptar bul sharany úkimet synshylarymen kúresý jáne tsenzýrany kúsheıtý dep baǵalap otyr.

Osyǵan baılanysty elde jastar, ásirese Z býyny (1995–2010 jyldary týǵandar) arasynda jappaı narazylyqtar bastaldy. Keıinirek úkimet áleýmettik jelilerge salynǵan tyıymdy alyp tastady, alaıda narazylyqtar basylmady.

Oqıǵalar aıasynda Nepal Prezıdenti Ram Chandra Paýdel otstavkaǵa ketse, buǵan deıin Premer-mınıstr Khadga Prasad Sharma Olı de qyzmetinen bas tartqan. Qaýipsizdik maqsatynda áskerıler olardy Katmandý qalasynan evakýatsııalady.

Budan buryn Nepalda narazylyq bildirýshiler úkimet ǵımarattaryn órtep jibergenin jazǵan edik. Keıbir adamdar terezeleri synǵan ǵımarattyń ishine kirip ketken. Ǵımarattyń syrtqy qabyrǵalarynda graffıtı jáne úkimetke qarsy jazýlar jazylǵan.