Nepaldaǵy tártipsizdikter kezinde túrmeden 15 myń adam qashyp ketken
ASTANA. KAZINFORM – Nepalda áleýmettik jelilerge tyıym salynǵannan keıin 31 adamnyń ómirin qıǵan narazylyqtardy paıdalanyp, túrmedegilerdiń jappaı qashý jaǵdaılary tirkeldi. Naqtyraq aıtqanda 15 myńnan astam qamaýda otyrǵan adam bostandyqqa shyǵyp ketken, dep jazady Anadoly.
The Kathmandu Post basylymynyń habarlaýynsha, Nepal premer-mınıstri Khadga Prasad Sharma Olı men birneshe mınıstrdiń otstavkaǵa ketkenine qaramastan, eldegi narazylyqtar kúsheıip, qaýipsizdik salasynda kúrdeli daǵdarys týyndaǵan.
Narazylyq aktsııalary kezinde qatysýshylar birneshe túrmege shabýyl jasap, ákimshilik ǵımarattaryn órtep, keı túrmelerdiń esikterin ashyq qaldyrǵan. Sonyń saldarynan el aýmaǵyndaǵy 25-ten astam túrmeden sottalǵandar qashyp ketken.
Bir kolonııada sottalǵandardyń jartysyna jýyǵy qashyp shyqqan. Osy oqıǵa kezinde polıtsııa oq atyp, 5 adam qaza tapqan. Taǵy bir túrmede jaǵdaıǵa áskerıler aralasyp, 10-nan astam tutqyn jaraqat alǵan.
Tártipsizdikterge qarsy ásker men polıtsııa jumyldyryldy
El astanasynda túrmeden qashyp shyqqan adamdar kóshege shyqqan soń, ásker túrmeler mańyndaǵy aýdandardy baqylaýǵa alǵan.
Qashyp ketkenderdiń arasynda aýyr qylmys úshin sottalǵan, kisi óltirý, zorlaý, adam saýdasy isteri boıynsha jazasyn ótep júrgender, sondaı-aq shetel azamattary da bar. Olardyń keıbirin quqyq qorǵaý organdary qaıta ustaǵan, al keıbiri óz erkimen oralǵan.
Eldegi saıası jaǵdaı turaqsyz, zorlyq-zombylyq kúsheıip tur
Narazylyq bildirýshiler saıasatkerlerge jáne memlekettik nysandarǵa áli shabýyldap jatyr.
Burynǵy premer-mınıstr Djhala Nath Khanaldyń jubaıy Ravı Lakshmı Chıtrakar úıine jasalǵan shabýyl kezinde kúıip qalyp, hal ústinde jatyr. Bul oqıǵa kezinde taǵy 27 adam jaraqat alǵan, olardyń 25-i aýrýhanadan shyǵarylǵan.
Premer-mınıstr Olıdiń otstavkasynan keıin de elde saıası jaǵdaı turaqsyz bolyp otyr. Narazylyq bildirýshiler ózara kelispeýshilikterge baılanysty ýaqytsha úkimetti basqarýǵa kandıdat usyna almaı jatyr.
Narazylyqtyń órshýi jáne jastar kóterilisi
4 qyrkúıekte Nepal bıligi Facebook, Instagram, WhatsApp, YouTube, X (burynǵy Twitter), Reddit jáne LinkedIn jelilerine ýaqytsha tyıym saldy. Sebep — bul kompanııalar belgilengen merzimde eldiń Baılanys jáne aqparattyq tehnologııalar mınıstrligine tirkeýge ótinim bermegen.
Bul sheshim jastar arasynda úlken narazylyq týǵyzyp, olar tek áleýmettik jelilerdi buǵattaýǵa ǵana emes, sybaılas jemqorlyqqa da qarsy shyqty.
Polıtsııa men narazylyq bildirýshiler arasyndaǵy qaqtyǵystar kezinde sýatqyshtar, kóz jasaýratatyn gaz jáne oq-dári qoldanyldy. Qaqtyǵystar saldarynan 31 adam kóz jumyp, 1000-nan astam adam jaraqat aldy.
Keıin bılik áleýmettik jelilerge qoıylǵan tyıymdy alyp tastady, al Іshki ister, Aýyl sharýashylyǵy jáne Sý resýrstary mınıstrleri otstavkaǵa ketti. Biraq bul narazylyqty toqtata almady. Jınalǵandar premer-mınıstr men mınıstrlerdiń úıin, sondaı-aq parlament, Joǵarǵy sot jáne Nepal kongresiniń Sanepedegi shtab-páterin órtedi.
Jaǵdaıdyń ýshyǵýyna baılanysty áskerıler mınıstrlerdi rezıdentsııalarynan tikushaqpen evakýatsııalaýǵa kiristi.
9 qyrkúıekte Nepal premer-mınıstriniń keńsesi resmı túrde Olıdiń otstavkaǵa ketkenin rastady. Bul sheshim eldegi jappaı narazylyqtar men úkimetke qysymnyń saldarynan qabyldandy.
Osyǵan deıin Nepaldaǵy túrmeden 1500 tutqyn qashyp ketkeni týraly jazdyq.
Sondaı-aq Nepal premer-mınıstri jappaı narazylyqtar tusynda otstavkaǵa ketti.