Nepaldaǵy sý tasqynynan joǵalyp ketken týrıster baılanysqa shyǵa bastady
ASTANA.KAZINFORM — Nepaldaǵy iri sý tasqynynan keıin Qytaımen shekarada izdeý-qutqarý jumystary jalǵasyp jatyr. Keıingi málimetter boıynsha, kem degende 1118 adam qaza tapty, dep habarlaıdy AR.
Sonymen qatar Nepal Syrtqy ister mınıstrliginiń málimeti boıynsha, 3 900-den astam adam áli habar-osharsyz. Olardyń arasynda 39 elden kelgen 590 azamat bar.
Qutqarýshylar 324 sheteldik azamatty evakýatsııalady.
Qytaı tarapynyń málimeti boıynsha, 16 adam qaza tapty, al shamamen 550 adam iz-túzsiz joǵalyp ketken.
Buǵan deıin habar-osharsyz ketkender tiziminde tirkelgen keıbir týrıster bılik organdaryna habarlasa bastady. Máselen, Aýstralııa premer-mınıstri joǵalyp ketken aýstralııalyqtardyń sany 43-ten 38-ge kemigenin habarlady.
Taǵy bes sheteldik týrıst Nepal bıligimen telefon nemese elektrondyq poshta arqyly baılanysqan.
Nepal — Qytaı shekarasynda da qutqarý jumystary jalǵasyp jatyr. Qytaılyq mamandar aýyr tehnıkanyń kirýine múmkindik berý úshin Gırong portynyń mańyndaǵy zardap shekken aımaqqa ýaqytsha jol saldy.
Shekara kesheni sý, balshyq jáne tas tasqynynan qırap qalǵan.
Eske salaıyq, 26 tamyzda Nepal-Qytaı shekarasynyń mańynda bolǵan sý tasqyny alapat kóshkinge ulasqan edi.
Buǵan deıin Qytaı Halyq Respýblıkasynyń Sý resýrstary mınıstrligi Nepaldaǵy Tsotszıan ózeninde jańa kóshkinder men kishigirim kóldiń paıda bolý qaýpi týraly eskertken bolatyn.
