Nepaldaǵy sý tasqynynan qaza tapqandar sany 800-ge jýyqtady
ASTANA. KAZINFORM – Nepalda muzdyqtyń opyrylýynan keıin bolǵan joıqyn sý tasqynynan qaza tapqandar sany 794 adamǵa jetip, 2,5 myńnan astam adam iz-túzsiz joǵalǵandar qatarynda qalyp otyr, dep habarlaıdy BBC.
Nepal men Qytaı bıligi sársenbi kúni bolǵan tabıǵı apattan keıin joǵalǵandardy izdeý jáne qaza tapqandardy anyqtaý jumystaryn jalǵastyryp jatyr.
Qytaı bıliginiń málimetinshe, shekaranyń Qytaı jaǵynda 16 adam qaza taýyp, taǵy 546 adam iz-túzsiz joǵalǵan. BBC Qytaıda tabıǵı apat pen onyń saldary týraly aqparattyń shekteýli jarııalanyp jatqanyn atap ótti.
Qutqarýshylar qalyń laı basqan eldi mekenderdi tekserip jatyr. Alaıda juma kúninen beri tolassyz jaýǵan jańbyr izdestirý-qutqarý jumystaryn qıyndatqan. Taýly aımaqtarda seldiń qaıta júrý qaýpi de saqtalyp otyr.
Mamandardy apattan keıin paıda bolǵan jańa kól de alańdatyp otyr. Eger onyń tabıǵı bógeti buzylsa, baqylaýsyz sý aǵyny Nepaldaǵy Lhende jáne Trıshýlı ózenderine quıylyp, jańa sý tasqynyna ákelýi múmkin.
– Nepal jaǵyndaǵy qutqarý operatsııalary Trıshýlı ózeniniń joǵarǵy aǵysyndaǵy bes bógette tiri qalǵan adamdardy izdeýge baǵyttalǵan. Bılik málimetinshe, bógetterdiń birindegi tonnelde 350-ge deıin adam bolýy múmkin. Qutqarýshylar tonnelge aýa jetkizý úshin tesik burǵylap, ishke kirýge múmkindik beretin jol ashýǵa tyrysyp jatyr, – delingen habarlamada.
Qyzyl Krest baǵalaýynsha, sý tasqyny bolǵan aýmaqta 90 myńǵa deıin adam ártúrli deńgeıde zardap shegýi múmkin.
Nepal bıligi ázirge 592 sheteldik azamatty taba almaı otyr. Olardyń basym bóligi Qytaıdyń Tıbet avtonomııalyq aýdanyndaǵy qasıetti Kaılas taýyna bet alǵan zııaratshylar bolǵan.
Aıta keteıik, Qytaı-Nepal shekarasynda eki qazaqstandyq týrıst izdestirilip jatyr.
