Nepaldaǵy sý tasqynynan qaza tapqandar sany 1294 adamǵa jetti
ASTANA. KAZINFORM – Nepaldaǵy joıqyn sý tasqynynan qaza tapqandar sany 1294 adamǵa jetip, taǵy 5053 adammen baılanys ornatylmaı otyr, dep habarlaıdy Nepaldyń Tabıǵı apattar qaýpin azaıtý jáne olardy basqarý jónindegi ulttyq basqarmasy (NDRRMA).
Vedomstvonyń jańartylǵan deregine sáıkes, qazirgi ýaqytqa deıin 1294 adamnyń denesi tabylǵan. 5053 adammen áli baılanys joq. Qutqarýshylar 13 095 adamdy aman alyp qaldy, al tekserilgen tizimge 5006 adamnyń aty-jóni engizilgen.
Bılik tabıǵı apattan eń kóp zardap shekken aýdandarda izdestirý-qutqarý jumystaryn jalǵastyryp jatyr. Bul jumystarǵa Nepal armııasynyń áskerı qyzmetshileri, polıtsııa, qarýly polıtsııa, mamandar men eriktiler jumyldyrylǵan.
– «Baılanys joq» degen kórsetkishti iz-túzsiz joǵalǵan adamdardyń naqty sany retinde qabyldaýǵa bolmaıdy. Aqparat áli de naqtylanyp, tizimder tekserilip jatyr, – dep túsindirdi quzyrly organ.
Buǵan deıin bılik eldegi turǵyn úıler men ınfraqurylymnyń aýqymdy qıraǵanyn habarlaǵan. Sý tasqyny men sel júrgen aýdandarda qalyp qoıǵan adamdardy izdeý jalǵasyp jatyr.
Qutqarý operatsııasy barysynda toǵyz kún boıy jer astynda qalǵan eki adamnyń tiri tabylǵany da belgili boldy. Upper Trishuli 3A sý elektr stantsııasynyń eki jumysshysy sý basqan týnnelden aman shyǵaryldy.
Joıqyn sý tasqyny 26 tamyzda Nepal men Qytaı shekarasyna jaqyn aýmaqta muzdyq opyrylǵannan keıin bastalǵan. Sý, laı men tas aralasqan aǵyn Trıshýlı ózeniniń ańǵarymen ótip, eldi mekenderdi, joldardy, kópirler men energetıkalyq nysandardy qıratty. Keı jerlerde tasqyn deńgeıi ózenniń qalypty arnasynan júzdegen metrge deıin kóterilgen.
Sondaı-aq tabıǵı apat aımaǵynda Qazaqstannan barǵan úshinshi týrıstiń bolǵany anyqtaldy.
Aıta keteıik, BUU Nepaldaǵy sý tasqynynan zardap shekkenderge kómek kórsetý úshin 49,6 mln dollar surady.
