Nepaldaǵy sý tasqyny: 675 adam qaza taýyp, 2,5 myńǵa jýyq adam iz-túzsiz joǵaldy
ASTANA. KAZINFORM – Nepalda joıqyn sý tasqynynan qaza tapqandar sany 675 adamǵa jetip, taǵy 2498 adam iz-túzsiz joǵalǵandar qatarynda qalyp otyr, dep habarlaıdy Xinhua agenttigi.
Nepaldyń Tabıǵı apattar qaýpin azaıtý jáne olardyń saldaryn joıý jónindegi ulttyq basqarmasynyń málimetinshe, bul derekter senbi kúni jergilikti ýaqyt boıynsha saǵat 18:30-daǵy jaǵdaıǵa sáıkes tirkelgen.
Qutqarý jáne izdestirý jumystary sý tasqynynan zardap shekken aýdandarda jalǵasyp jatyr.
Sonymen qatar tabıǵı apat saldarynan júzdegen týrıstpen baılanys úzilgen.
– Nepaldyń Mádenıet, týrızm jáne azamattyq avıatsııa mınıstrligine qarasty Týrızm departamentiniń málimetinshe, jergilikti ýaqyt boıynsha saǵat 17:30-da barlyǵy 753 týrıstpen baılanys bolmaǵan. Olardyń 589-y – shetel azamattary, – delingen habarlamada.
Katmandý okrýginiń ákimshiligi senbi kúni shuǵyl úndeý jarııalap, el astanasyndaǵy túrli qaýymdastyqtardy, mekemelerdi, kásiporyndar men jeke tulǵalardy tabıǵı apattan zardap shekkenderge gýmanıtarlyq kómek kórsetýge shaqyrdy.
Jınalatyn gýmanıtarlyq júkter eń kóp zardap shekken Rasýva, Nývakot jáne Dhadıng okrýgteriniń turǵyndaryna jiberiledi.
Aıta keteıik, Nepalda sý elektr stantsııasynyń júzdegen jumysshysy tonnelderde qalyp qoıýy múmkin.
