Nepaldaǵy sý tasqynynan 1 300-den astam adam qaza tapty: elde aza tutý kúni jarııalandy
ASTANA. KAZINFORM — Nepalda 26 tamyzda bolǵan alapat sý tasqynynan qaza tapqandardy eske alý úshin dúısenbi kúni ulttyq aza tutý kúni dep jarııalandy. Memlekettik mekemelerde týlar tómen túsirilip, qaza tapqandardyń otbasylary dástúrli aza tutý rásimderin ótkizip jatyr, dep habarlaıdy Kazinform agenttigi Euronews-ke silteme jasap.
Resmı málimetke qaraǵanda, Nepal men Tıbettegi tabıǵı apattan 1 300-den astam adam qaza tapqan. Taǵy 5 000-ǵa jýyq adam, onyń ishinde shetel azamattary da bar, ázirshe habar-osharsyz ketkender qatarynda.
Halqynyń basym bóligi ındýızm dinin ustanatyn Nepalda aza tutý dástúr boıynsha 13 kúnge sozylady. Osy kezeńde marqumdardyń jaqyn týystary úıde bolyp, qalǵandary kóńil aıtý úshin keledi. On úshinshi kúni arnaıy rásimder ótkizilip, qaıtys bolǵandardyń rýhyna duǵa jasalady.
Týystary áli kúnge deıin habar-osharsyz ketken birneshe adam dástúrli aza tutý rásimderin saqtaı otyryp, sımvolıkalyq jerleý rásimin ótkizdi. Indýızm dástúrinde máıitti órteý eń mańyzdy qorytyndy rásimderdiń biri bolyp esepteledi. Sondyqtan keıbir otbasy úshin jaqyndarynyń denesi tabylmasa da, jerleý rásimin ótkizý rýhanı turǵydan jeńildik sezimin beredi.
Katmandýda týystary premer-mınıstrdiń rezıdentsııasy men birneshe mınıstrliktiń ǵımaraty aldyna jınalyp, bılikten júzdegen adamdy izdeý jumystaryn jedeldetýdi talap etti. Olardyń arasynda sý tasqyny kezinde Bhotekoshı ózeniniń aǵynymen aǵyp ketken nemese úıindi astynda qalǵan gıdroelektr stantsııalarynda jumys istegen adamdar bar.
Áli de habar-osharsyz ketken júzdegen adamdy izdeý jumystary jalǵasyp jatyr.
Senbi kúni qutqarýshylar elektr stantsııalarynyń biriniń aýmaǵynan Qytaı azamatyn tapty. Al juma kúni osy jerden eki nepaldyq azamat qutqarylǵan.
Bıliktiń málimetinshe, qazir negizgi kúsh 12 gıdroenergetıkalyq nysanǵa baǵyttalǵan. Onda shamamen 900 jumysshy habar-osharsyz ketken, al olardyń 500-ge jýyǵy týnnelderde qalyp qoıǵan bolýy múmkin.
Buryn-sońdy bolmaǵan synaq
— Bul apat buryn-sońdy bolmaǵan synaqqa aınaldy, — dedi dúısenbi kúni aýstralııalyq qutqarý operatsııalarynyń sarapshysy.
Onyń aıtýynsha, izdeý-qutqarý jumystary bir ýaqytta birneshe gıdroelektr stantsııasynyń týnnelinde júrgizilip jatyr.
— Biz buǵan deıin mundaı jaǵdaıǵa eshqashan tap bolǵan emespiz. Negizinde, bul bir ǵana operatsııa emes, ártúrli jerde bir ýaqytta júrgizilip jatqan birneshe operatsııa. Olardyń árqaısysynyń óz táýekeli, belgisizdigi jáne áli de qutqarýǵa bolatyn adam ómiri bar, — dep jazdy H áleýmettik jelisinde Halyqaralyq týnnelder jáne jerasty keńistigi qaýymdastyǵynyń prezıdenti Arnold Dıks.
— Qutqarý operatsııasy alǵashqy kúndegideı qarqynmen jalǵasyp jatyr. Bizdiń kúsh-jigerimiz úsh baǵytta — jerde, áýeden jáne týnnelderde izdeý-qutqarý jumystaryna shoǵyrlanǵan. Eshkimniń qaqpanǵa túsip, kómeksiz qalmaýy úshin qoldan kelgenniń bárin jasap jatyrmyz, — dedi dúısenbi kúni AFP agenttigine Nepal armııasynyń resmı ókili Radja Ram Basnet.
Demalys kúnderi týnnelderden úsh jumysshynyń qutqarylýy ózge de tiri qalǵandardy tabýǵa úmit otyn jaqty.
Úndistan, Qytaı, Ońtústik Koreıa jáne AQSh-tan kelgen qutqarýshylar úıindilerdi, zaqymdanǵan nysandar men týnnelderdi tekserip, tiri qalǵandardy izdeý jumystaryn jalǵastyryp jatyr.
— Bizdi qansha adamnyń ómirin qutqarǵanymyzben ǵana emes, áli de izdeý jumystaryn toqtatpaı, habar-osharsyz ketken adamdardy izdeýdi jalǵastyryp jatqanymyzben de baǵalaıdy, — dedi Dıks.
Eske salaıyq, buǵan deıin BUU Nepaldaǵy sý tasqynynan zardap shekkenderge kómek kórsetý úshin 49,6 mln dollar suraǵanyn habarlaǵanbyz.
