Nepaldaǵy sý tasqyny: Mektepterdi qalpyna keltirýge $15 mln-nan asa qarjy qajet
ASTANA. KAZINFORM — Nepal bıligi joıqyn sý tasqynynan zardap shekken bilim berý ınfraqurylymyn qalpyna keltirý shyǵynyn 2,34 mlrd nepal rýpııasyna, ıaǵnı shamamen 15,3 mln dollarǵa baǵalady, dep habarlaıdy Kazinform tilshisi The Kathmandu Post basylymyna silteme jasap.
Tabıǵı apat saldarynan 9 myńnan astam oqýshynyń bilim alýyna kedergi keldi.
Zalal men qajettilikterdi jedel baǵalaýdy Ulttyq josparlaý komıssııasy men Tabıǵı apattar qaýpin azaıtý jáne basqarý jónindegi ulttyq basqarmanyń jetekshiligimen qurylǵan tehnıkalyq top júrgizdi.
Bıliktiń málimetinshe, Rasýva aýdanynda 18 mektep zardap shekken. Onyń 11-iniń ǵımaraty tolyǵymen qırasa, taǵy jeteýi zaqymdanǵan. Ǵımarattarmen birge oqý quraldary, jıhazdar jáne basqa da múlik joıylǵan.
Mektepterdi shuǵyl qalpyna keltirip, oqý protsesin qaıta bastaý úshin shamamen 688 myń dollar qajet. Al bilim berý ınfraqurylymyn uzaq merzimdi qaıta jańǵyrtýǵa taǵy 14,7 mln dollar kerek.
Úkimet tabıǵı apat saldarynan ata-anasynan nemese qamqorshysynan aıyrylǵan, sondaı-aq úılerin tastap ketýge májbúr bolǵan balalarǵa arnaıy shákirtaqy baǵdarlamasyn da jarııalady. Bul qoldaý olardyń mektepti aıaqtaǵanǵa deıin oqýyn jalǵastyrýyna múmkindik bermek.
Sý tasqyny bilim berý júıesine ǵana emes, basqa da salalarǵa aıtarlyqtaı zııan keltirdi. Úkimettiń aldyn ala baǵalaýynsha, eldegi zaqymdanǵan barlyq ınfraqurylymdy qalpyna keltirýge shamamen 4,74 mlrd dollar qajet. Bul qarajattyń shamamen 75 paıyzy energetıka, joldar, turǵyn úı jáne negizgi kommýnaldyq nysandardy qosa alǵanda, ınfraqurylymdy qalpyna keltirýge jumsalmaq.
Sý tasqyny saldarynan 69 shaqyrym avtomobıl joly zaqymdanyp, 33 avtokólik kópirin sý shaıyp ketken. Taǵy tórt kópir búlingen. 64 jaıaý júrginshiler kópiriniń 53-i zardap shekken. Kólik ınfraqurylymyn qalpyna keltirýdiń ózine shamamen 480,6 mln dollar qajet.
Katmandýdy Nepaldyń ortalyq jáne batys aımaqtarymen baılanystyratyn Prıthvı tasjolynda da kúrdeli jaǵdaı saqtalyp otyr. Krıshnabhır mańyndaǵy joldyń bir bóligi qıraǵannan keıin bılik Trıshýlı ózeniniń qarsy jaǵalaýynda balama jol salýdy qolǵa aldy. Zaqymdanǵan ýchaskede kólik qozǵalysy shamamen 300 metrge toqtaǵan.
Múmkindigi shekteýli adamdardyń jaǵdaıy da ózekti máselege aınaldy. The Kathmandu Post basylymynyń habarlaýynsha, evakýatsııadan keıin olardyń kópshiligi gýmanıtarlyq kómek alyp, ýaqytsha ortalyqtarǵa ornalasýda jáne qajetti júrip-turý quraldaryna qol jetkizýde qıyndyqtarǵa tap bolyp otyr. Nepaldyń Múmkindigi shekteýli adamdar ulttyq federatsııasynyń málimetinshe, 11 qyrkúıekke deıin 59 adamnyń basqa jerge kóshirilgeni rastalǵan, 14 adam habar-osharsyz ketken, al alty adam qaza tapqan.
Buǵan deıin Nepaldy sý tasqynynan keıin qalpyna keltirýge 4-5 mlrd dollar qajet bolýy múmkin degen boljam jasalǵan edi. Keıin úkimet júrgizgen jedel baǵalaý qajetti qarjy kólemin shamamen 4,74 mlrd dollar dep anyqtady. Alaıda Dúnıejúzilik bank pen basqa sarapshylardyń qatysýymen júrgiziletin egjeı-tegjeıli baǵalaýdan keıin bul soma ózgerýi múmkin.
Buǵan deıin Kazinform Nepaldaǵy sý tasqyny saldarynan qaza tapqandar sany 1300 adamnan asqanyn jáne elde ulttyq aza tutý kúni jarııalanǵanyn habarlaǵan bolatyn.
