Nepaldaǵy sý tasqyny qurbandarynyń sany 1,2 myńnan asty
ASTANA. KAZINFORM - Nepaldaǵy sý tasqynynan qurban bolǵandar sany 1 204 adamǵa jetti. Taǵy 4 216 adam iz-túzsiz joǵalǵandar qatarynda. Qutqarý jáne izdestirý jumystary júrip jatyr, dep habarlaıdy reseıdik TASS.
Nepaldyń Apat qaýpin azaıtý jáne onyń saldaryn joıý ulttyq basqarmasynyń málimetinshe, alapat sý tasqynynan qaza tapqandar sany 1 204 adam boldy. Taǵy 4 216 adam habar-osharsyz ketken dep esepteledi.
Tabıǵı apat 26 tamyzda Nepal men Qytaı shekarasyndaǵy Gımalaı taýlarynda muzdyqtyń opyrylýynan keıin bolǵan. Sý, muz, laı jáne tas aralasqan ekpindi aǵyndar ańǵarlardy boılap, turǵyn úılerdi, joldar men kópirlerdi, sondaı-aq gıdroenergetıka nysandaryn qıratyp ketken.
Qazir qutqarýshylar negizgi kúshti gıdroenergetıka nysandaryn tekserýge baǵyttap otyr. Júzdegen jumysshy jerasty tonnelderinde qalyp qoıýy múmkin. Keı ýchaskelerde ınjenerler tonnelderdiń ishine aýa aıdap jatyr. Bul tiri qalǵan adamdardy tabýǵa áli de úmit bar ekenin kórsetedi. Qutqarý jumystaryna basqa elderdiń mamandary da tartyldy.
BAQ málimetinshe, apattan zardap shekken aýdandarda myńdaǵan polıtsııa qyzmetkeri, áskerı jáne qutqarýshy izdestirý jumystaryna ári apat saldaryn joıýǵa qatysyp jatyr. Sonymen qatar eń kóp zardap shekken eldi mekenderde baılanys, elektrmen jabdyqtaý jáne kólik ınfraqurylymy qalpyna keltirilip jatyr.
Bılik qaza tapqandardyń aty-jónderin anyqtaýda da qıyndyqtarǵa tap boldy. Tulǵasy anyqtalmaǵan máıitterden DNQ úlgileri alynyp, keıin olar joǵalǵan adamdardyń týystarynan alynǵan úlgilermen salystyrylady. Keıbir aýdandarda jaqyndary taǵdyry belgisiz adamdarǵa arnap sımvolıkalyq jerleý rásimderin ótkizip jatyr.
Osyǵan deıin Nepalda áli de kóshkin qaýpi bar ekenin jazdyq.
Sondaı-aq Nepaldaǵy sý tasqynynan joǵalyp ketken týrıster baılanysqa shyǵa bastady.
