Nepaldaǵy sý tasqyny: 1003 adam qaza tapty, 600 jumysshy týnnelde jatyr
ASTANA. KAZINFORM – Nepaldyń Qytaımen shekaralas aımaǵynda ótken aptada bolǵan joıqyn sý tasqynynan keminde 1003 adam qaza tapty. Bul týraly seısenbi kúni Nepaldyń tótenshe jaǵdaılar jónindegi basqarmasyna silteme jasap VVS habarlady.
3900-den astam adam áli iz-túzsiz joǵalǵandar qatarynda. Olardyń arasynda Trıshýlı ózeni boıyndaǵy sý elektr stantsııalarynyń laıǵa tolǵan aýqymdy týnnelder jelisinde qalyp qoıýy múmkin 600-den astam jumysshy bar. Qazir ınjenerler týnnelderge aýa jiberip jatyr.
Qutqarýshylar toby týnnelderdiń birine kirip úlgergenimen, jer astynan eshkimdi tappaǵan.
Nepal Premer-mınıstri Balendra Shahtyń aıtýynsha, dúısenbi kúni elektr stantsııalarynan 279 adam qutqarylǵan.
Qutqarý operatsııasyn Qytaı men Nepal áskerı qyzmetshilerinen quralǵan halyqaralyq top júrgizip jatyr. Oǵan Úndistan, Koreıa jáne Aýstralııa mamandary da qatysyp jatyr.
Nepal elektr energııasyn óndirýde gıdroenergetıkaǵa aıtarlyqtaı táýeldi. El kóptegen jyl boıy taýly ózender boıynda gıdroenergetıkalyq jobalardy damytyp keledi.
Bılik málimetinshe, sý tasqynynan paıdalanýǵa berilgen jáne qurylysy júrip jatqan keminde 11 gıdroenergetıkalyq joba zaqymdanǵan.
Ótken demalys kúnderi qutqarýshylar týnnelderge aýa aıdaı bastaǵan. Alaıda jer astynda qalǵan jumysshylardyń týystary muny erterek jasaý kerek bolǵanyn aıtyp otyr.
Nepal úkimetiniń basshysy qutqarý operatsııasy kúsheıtiletinin málimdep, joıqyn sý tasqynyn jahandyq klımattyń ózgerýimen baılanystyrdy.
Aıta keteıik, buǵan deıin Nepalda áli de kóshkin qaýpi bar ekenin jazdyq.
Sondaı-aq qutqarýshylar Nepalda joǵalyp ketken Ońtústik Koreıa azamattaryn tikushaqpen jáne dronmen izdep jatyr.
