Nepaldaǵy sý tasqyny qurbandarynyń sany 359-ǵa jetti, 1400 adam iz-túzsiz joǵalǵan
ASTANA. KAZINFORM – Nepaldaǵy joıqyn sý tasqynynan qaza bolǵandar sany 359 adamǵa jetti. Іzdeý-qutqarý jumystary jalǵasyp jatyr, júzdegen adam, onyń ishinde sheteldik týrıster men qajylar áli de habar-osharsyz ketken, dep habarlaıdy Reuters.
Apat 26 tamyzda Nepal men Qytaı shekarasyndaǵy Gımalaı aımaǵynda muzdyqtyń opyrylýynan keıin bolǵan. Sý, muz, laı men tas aralasqan joıqyn aǵyn ańǵarlar men eldi mekenderdi basyp ótip, úılerdi, joldar men kópirlerdi jáne basqa da ınfraqurylym nysandaryn qıratyp ketken.
Sońǵy málimet boıynsha, Nepalda keminde 359 adam qaza tapqan. Tıbette taǵy úsh adam kóz jumdy. Nepal men Qytaıda 1,4 myńnan astam adam iz-túzsiz joǵalǵandar qatarynda. Olardyń arasynda ondaǵan elden kelgen týrıster men qajylar bar.
Kóptegen sheteldik azamattar Nepal arqyly Tıbettegi ındýızm men býddızm dinderin ustanýshylar úshin qasıetti oryndardyń biri sanalatyn Kaılash taýyna bet alǵan. Sý tasqyny shekaradaǵy Gırong ótkizý pýnkti ornalasqan aýmaqqa da zııan keltirdi.
Qutqarý qyzmetteri habar-osharsyz ketkenderdi izdep jatyr. Qıraǵan joldar men kópirler, sondaı-aq taýly jerdiń qoljetimsiz bolýy jumystardy qıyndatyp otyr. Adamdardy evakýatsııalaý jáne gýmanıtarlyq kómek jetkizý úshin tikushaqtar tartylǵan.
Bastapqyda tabıǵı apatqa jer silkinisi sebep bolýy múmkin degen boljam aıtylǵan. Alaıda AQSh Geologııalyq qyzmeti tirkelgen seısmıkalyq sıgnal jer silkinisinen emes, muzdyqtyń opyrylýy men odan keıingi laı kóshkininen týyndaǵan degen qorytyndyǵa kelgen.
Buǵan deıin Kazinform Nepaldaǵy joıqyn sý tasqynyna Lhende ózeniniń arnasyn ýaqytsha bógep qalǵan muzdyq pen taý jynystarynyń opyrylýy sebep bolýy múmkin ekenin habarlaǵan edi. Tabıǵı bóget buzylǵannan keıin qýatty sý aǵyny ózenniń tómengi aǵysyna qaraı umtylǵan.
Sondaı-aq Kazinform sý tasqynynan keıin joǵalǵandar arasynda Qazaqstan azamaty baryn habarlaǵan bolatyn. Ol týrıstik top quramynda Nepaldan Qytaıǵa ótken. Qazaqstandyq dıplomattar onyń qaı jerde ekenin anyqtap jatyr.
27 tamyzda Kazinform Nepal men Qytaı aýmaǵynda myńnan astam adamnyń iz-túzsiz joǵalǵanyn jazǵan edi. Sol kezde Qytaıdyń Sıtszan aımaǵynda 558 adam, onyń ishinde 260 sheteldik izdestirilip jatqan.
