Nepaldaǵy Hımlýng-Hımal taýlaryndaǵy qar kóshkini qurbandarynyń sany 15-ke jetti
ASTANA. KAZINFORM – Nepaldaǵy Hımlýng-Hımal shyńynyń bazalyq lagerinde qar kóshkini bolyp, 15 adam qaza boldy. Qazir qutqarýshylar habar-osharsyz ketken sońǵy adamdy izdep jatyr, dep habarlaıdy Kazinform Sınhýaǵa silteme jasap.
Buǵan deıin qutqarýshylar taǵy segiz adamnyń denesin tapqan. Bul týraly jergilikti bılik ókili habarlady.
Qar kóshkininen qaza bolǵan segiz adamnyń ekeýiniń súıegi tikushaqpen Chame aýylyndaǵy aýdandyq aýrýhanaǵa jetkizildi. Qalǵan altaýynyń súıegi sol aýdandaǵy Phý aýylyna jóneltildi.
Manang okrýgi ákiminiń orynbasary Krıshna Prasad Paýdeldiń aıtýynsha, apattan habar-osharsyz ketken 16 adamnyń 15-iniń súıegi beısenbige deıin tabylǵan. Sońǵy joǵalǵan adamnyń jeke zattary qolda bolǵanymen, ózi áli izdestirilip jatyr.
Jeksenbi kúni tańerteń bıiktigi 7126 metr Hımlýng-Hımal shyńynyń bazalyq lagerinde 16 adam bolǵan. Eki ekspedıtsııanyń taý gıdteri men aspazdary lagerdi ázirlep, arqan bekitip jatqanda, qar kóshkini júrdi.
K. P. Paýdeldiń aıtýynsha, habar-osharsyz ketken sońǵy adamdy izdeý 2 qazanda qaıta jalǵasady.
Buǵan deıin Gımalaıdaǵy lagerdi qar kóshkini basyp, Nepaldyń 14 azamaty iz-túzsiz ketkeni habarlanǵan bolatyn.
