Nepalda sý elektr stantsııasynyń júzdegen jumysshysy tonnelderde qalyp qoıýy múmkin
ASTANA. KAZINFORM — Nepaldaǵy joıqyn sý tasqynynan keıin júzdegen sý elektr stantsııasynyń jumysshylary tonnelder men jerasty mashına zaldarynda qalyp qoıýy múmkin. Qutqarýshylar Trıshýlı ózeni dálizindegi qıraǵan nysandarǵa jetý jolynda úlken qıyndyqtarǵa tap bolyp jatyr, dep habarlaıdy The Kathmandu Post.
Sý tasqyny sársenbi kúni boldy. Kóshkin sýy joldar men kópirlerdi shaıyp ketip, tonnel aýyzdary balshyqpen bitelip qaldy.
Jergilikti bılik áli kúnge deıin jumysshylar týraly naqty aqparat bere almaı otyr.
Nepaldyń táýelsiz elektr energııasyn óndirýshiler qaýymdastyǵynyń (IPPAN) málimetinshe, 11 sý elektr stantsııasy jobasymen baılanysty 934 adammen baılanys bolmaı tur. Ár nysanda qalyp qoıǵan adamdardyń naqty sanyn anyqtaý da ázirshe múmkin emes.
Nepal armııasy birneshe qutqarý operatsııalaryn júrgizdi. Joǵarǵy Trıshýlı-1 tonnelderinen barlyǵy 254 adam qutqaryldy, al Langtang Khola sý elektr stantsııasy jobasynan taǵy 18 adam qutqaryldy.
Basqa nysandarda ahýal áli de kúrdeli. Chilime sý elektr stantsııasynda segiz adam baılanyssyz, onyń altaýy laıǵa toly tonneldiń ishinde qalyp qoıýy múmkin.
Rasuwagadhi Hydropower Company sý elektr stantsııasynda da 49 qyzmetker baılanyssyz qaldy.
Nepaldyń Energetıka, sý resýrstary jáne sýarý mınıstrligi juma kúni sý elektr stantsııalarynyń jumysshylary men jergilikti turǵyndardy qosa alǵanda, 350 adam ártúrli sý elektr stantsııalarynan qutqarylǵanyn habarlady. Alaıda, mınıstrlik málimeti boıynsha, 100-den astam adam áli de tonnelder ishinde qalyp qoıýy múmkin.
Aldyn ala aqparat sonymen qatar zardap shekken aımaqtaǵy elektr stantsııalarynyń 1000-nan astam qyzmetkeri baılanyssyz qalǵanyn kórsetedi. Nepal elektr energetıkasy basqarmasynyń málimeti boıynsha, birneshe sý elektr stantsııalarynda jumys isteıtin 200-den astam adam iz-túzsiz joǵalyp ketken.
Qutqarýshylar sý tasqynynan keıin keıbir mashına zaldary men tonnelderin tabý múmkin bolmaǵanyn aıtady.
Sý tasqyny sonymen qatar Trıshýlı dálizi boıyndaǵy 14-15 sý elektr stantsııasyndaǵy shamamen 430 MVt qýattylyqty isten shyǵardy. Alaıda bılik eldiń elektr qýatymen qamtamasyz etilýine tikeleı qaýip joq ekenin málimdedi.
Nepal armııasy izdeý-qutqarý jumystaryn jalǵastyryp jatyr. Brıgada generaly Manodja Thapanyń aıtýynsha, áskerı kúshter 19 sý elektr stantsııasynyń tonnelin tekserýge kúsh salyp jatyr.
Senbi kúni jergilikti ýaqyt boıynsha saǵat 10:00-degi jaǵdaı boıynsha Nepaldaǵy kóshkin saldarynan 620-dan astam adam qaza taýyp, 2 426 adam iz-túzsiz joǵalyp ketken.
Sondaı-aq, Qytaı-Nepal shekarasynda taǵy bir Qazaqstan azamaty izdestirilip jatqanyn habarladyq.
