Nepalda jolaýshylar avtobýsy shyńyraýǵa qulap ketti
ASTANA. QazAqparat - Jolaýshylar avtobýsy Nepal astanasy Katmandýdan 85 shaqyrym jerde shyńyraýǵa qulap ketti. Keminde 35 adam qaza taýyp, birneshe ondaǵan adam túrli jaraqat aldy.
Jergilikti polıtsııa habarlaǵandaı, avtobýs Gımalaı taý jolynda kele jatyp, joldan syrǵyp ketip, 200 metrdeı jerge ushyp baryp qulaǵan.
Polıtsııa ókili avtobýstyń lyq toly bolǵanyn, tipti keıbir adamdar avtobýstyń tóbesinde otyrǵanyn habarlady.
Bı-bı-sı habarlaǵandaı, Nepalda janar-jaǵarmaıdyń jetispeýi saldarynan qoǵamdyq kólikter toqtap qalýda, al basqa kólikter amalsyzdan mólsherden kóp jolaýshy mingizýge májbúr.
