Nepalda áli de kóshkin qaýpi bar
ASTANA. KAZINFORM – Qytaı Halyq Respýblıkasynyń Sý resýrstary mınıstrligi Nepaldaǵy Tsotszıan ózeninde jańa kóshkinder men kishigirim kóldiń paıda bolý qaýpi týraly eskertti, dep habarlaıdy Kazinform agenttiginiń Beıjińdegi menshikti tilshisi jergilikti BAQ-qa silteme jasaı otyryp.
Vedomstvo sarapshylary osyndaı qorytyndyǵa 31 tamyzda túsirilgen apat aımaǵynyń spýtnıktik sýretterin taldaǵannan keıin keldi. Opyrylǵan shuńqyrdaǵy sý betiniń aýmaǵy 83 myń sharshy metrge deıin qysqardy. Bul aldyńǵy kúngi kórsetkishten 14 myń sharshy metrge az.
2,5 shaqyrym radıýsta, aǵys boıymen tómen qaraı úsh shaǵyn sý aıdyny anyqtaldy. Qazirgi ýaqytta olar ózen arnasymen jalǵasyp jatyr, sondyqtan ózen aǵyny bógelmegen. Alaıda opyrylǵan shuńqyrǵa jaqyn ornalasqan muzdyqtarda qar kóshkini qaýpi áli de saqtalady.
31 tamyzda ushqyshsyz ushý apparattarynan túsirilgen kadrlarda burynǵy Pýrepýtsıan-Tsangpo kólinen 3 km tómen ornalasqan ózenniń eki jaǵalaýyndaǵy kóshkin massalary baıqalady. Ózen arnasy qazirgi ýaqytta taza, biraq odan qaıtalama kóshkinder aǵyndy qaıtadan jaýyp, jańa qaýipti sý aıdynyn qalyptastyrýy múmkin.
Osyǵan deıin Nepal men Qytaı shekarasyndaǵy tasqynnan keıin 900-den astam adam qaza taýyp, 5 myńǵa jýyq adam habar-osharsyz ekenin habarladyq.
