Nepalda ushaq qulap, 40 adam qaza tapty

KATMANDÝ. QazAqparat – Nepaldyń Pokhara qalasynda ishki reıs ushaǵy apatqa ushyrap, 40 adam qaza tapty, dep habarlaıdy QazAqparat Reuters aqparat agenttigine silteme jasap.

Ushaq bortynda 72 adam: 68 jolaýshy jáne ekıpajdyń tórt múshesi bolǵan. Bul – elde keıingi bes jylǵa jýyq ýaqytta bolǵan eń iri apat. Nepal azamattyq avıatsııa basqarmasynyń ókili Djagannath Nırýla kúnniń ashyq bolǵanyn atap ótti.

«Keme Setı shatqalynan áýejaımen tańǵy saǵat 10:50-de (Grınvıch ýaqyty boıynsha 05:05) baılanysqa shyqty», - delingen avıatsııalyq mekemeniń málimdemesinde. Sodan keıin ol apatqa ushyrady.

Yeti Airlines ushaǵy qulaǵan mańda júzdegen qutqarýshy jumys istep jatyr. Polıtsııa ókili ushaqtyń órtenip jatqanyn, qutqarýshylardyń týrıstik qala áýejaıy janyndaǵy taý shatqalyna ázer jetkenin málim etti.

«Ushaq ekige bólinip, jartysy taý baýraıynda, qalǵan jartysy ózen shatqalyna qulap ketti», - dedi jergilikti turǵyn Arýn Tamý. Ol Reuters agenttigine ushaq qulaǵannan keıin apat ornyna birneshe mınýttan soń jetkenin aıtqan.

Hindustan Times gazetiniń habarlaýynsha, apatqa ushyraǵan bortta sheteldikter bolǵan: 5 úndi azamaty, 4 reseılik, 1 ırlandııalyq jáne 2 ońtústik koreıalyq. Keıbir BAQ bortta Avstralııa, Frantsııa jáne Argentına azamattary bolǵanyn habarlady.

Foto: Sagar Raj Timilsina/Handout via REUTERS