Nepalda narazylyqtardy basyp-janshyǵany úshin eks-premer men burynǵy ІІM basshysy ustaldy
ASTANA. KAZINFORM - Eldiń eń jas kóshbasshysy ant bergennen keıin birneshe saǵattan soń Nepal polıtsııasy ótken jyldyń qyrkúıegindegi narazylyqtardy kúshpen basý isine baılanysty burynǵy premer-mınıstr men eks-ishki ister mınıstrin qamaýǵa aldy.
Sol oqıǵalar kezinde 76 adam qaza taýyp, keminde 2300 adam jaralanǵan, dep habarlaıdy Euronews.
Nepal polıtsııasy burynǵy premer-mınıstr Khadga Prasad Sharma Olıdi onyń úkimetin qulatyp, kezekten tys saılaýǵa alyp kelgen jappaı narazylyqtar kezindegi adamdardyń qaza bolýyna baılanysty ustady.
Bılik yqpaldy kommýnıstik saıasatkerdi senbi kúni tańerteń astana Katmandý mańyndaǵy rezıdentsııasynda qolǵa túsirdi. Sondaı-aq burynǵy ishki ister mınıstri Ramesh Lekhak ta qamaýǵa alyndy. Oǵan kúshtik qurylymdarǵa demonstranttarǵa oq atýǵa buıryq berdi degen aıyp taǵylyp otyr.
Qazirgi ishki ister mınıstri Sýdan Gýrýng bul týraly áleýmettik jelide málimdedi.
- Eshkim zańnan joǵary emes. Biz burynǵy premer-mınıstr Sharma Olı men eks-mınıstr Ramesh Lekhakty qamaýǵa aldyq. Bul — kek alý emes, ádildiktiń bastalýy. Endi el jańa baǵytpen damıdy dep senemin, — dep jazdy ol Facebook-ta.
Úkimet qurǵan arnaıy komıssııanyń tergeýi Olıge, Lekhakqa jáne sol kezdegi polıtsııa basshysyna 10 jylǵa deıin bas bostandyǵynan aıyrý jazasyn qarastyryp otyr.
Arnaıy jasaqtalǵan polıtsııa birneshe júk kóligimen kelip, kúdiktilerdi úılerinen ustap, keıin Katmandý aýdandyq polıtsııa basqarmasyna jetkizgen.
Qamaýǵa alý áreketi jańa úkimettiń qyzmetke kiriskeninen bir kún ótken soń júzege asty. Úkimetti parlamenttik saılaýda jeńiske jetken «Rastrııa Svatantra» partııasynyń kóshbasshysy, reper Balendra Shah basqarady.
Balendra Shah pen Sýdan Gýrýng qaza tapqandar men jaralanǵandarǵa qatysty ádildikti qalpyna keltirýge ýáde berdi.
Bul saılaý elde 8–9 qyrkúıekte ótken jastardyń sybaılas jemqorlyq pen tıimsiz basqarýǵa qarsy narazylyqtarynan keıin alǵash ret uıymdastyryldy. Sol oqıǵalarda 76 adam qaza taýyp, 2300-den astamy jaralanǵan.
Ashýǵa býlyqqan jurt premer-mınıstr men prezıdent keńselerin, polıtsııa bólimshelerin jáne joǵary laýazymdy saıasatkerlerdiń úılerin órtep, olardy áskerdiń tikushaqtarymen qashýǵa májbúrlegen.
«Z býyny» belsendileri qozǵaý salǵan bul sherýler 12 qyrkúıekte Nepal tarıhyndaǵy alǵashqy áıel premer-mınıstrdiń taǵaıyndalýyna sebep boldy. Bul qyzmetke Joǵarǵy sottyń burynǵy sýdıasy Sýshıla Karkı kelip, saılaýǵa deıin ótpeli kezeńde úkimetti basqarǵan edi.
