Nepalda narazylyq kezinde 14 adam qaza tapty

ASTANA. KAZINFORM — Nepalda narazylyq kezinde polıtsııanyń oq jaýdyrýy saldarynan 14 adam qaza tapty. Bul týraly búgin, 8 qyrkúıekte The Katmandu Post gazeti dárigerlerge silteme jasap habarlady.

Basylymnyń málimetinshe, buǵan deıin Nepal úkimeti kórsetilgen merzimde Baılanys jáne aqparattyq tehnologııalar mınıstrliginde tirkelmegen birqatar iri áleýmettik jelilerdiń qyzmetine tyıym salý týraly sheshim qabyldaǵan.

Meta, Alphabet (YouTube), X (burynǵy Twitter), Reddit jáne LinkedIn sııaqty platformalarǵa tyıym salyndy. Nepal Kommýnıstik partııasynyń (Maoshyl ortalyq) parlamenttegi múshesi, partııanyń uıymdastyrýshysy Hıt Radj Pandeı bul sheshimdi qabyldanbaıdy dep baǵalap, áleýmettik jelilerdiń jabylýy elde tártipsizdikterge ákeletinin eskertti.

Jergilikti halyqtyń bir bóligi Nıý-Baneshvarǵa jınalyp, úkimettiń áreketine narazylyq bildirdi. Olar áleýmettik jelilerdegi shekteýler men úkimettegi jemqorlyqqa narazylyq bildirip, biraq polıtsııa olardy kúshpen basyp tastady.

— Nıý-Baneshvar aýdanyndaǵy sherý kezinde polıtsııanyń oq jaýdyrýy saldarynan 14 adam qaza tapty, - delingen habarlamada.

80-nen astam adam zardap shekti, olarǵa qajetti kómek kórsetilip jatyr, keminde 10 adamnyń jaǵdaıy aýyr.

Eske sala keteıik, Nepalda mýsson maýsymynda 43 adam kóz jumdy.